Top

Deputadu PD husu vise PM Kalbuadi klarifika karta notifikasaun ba IP-EP

Embaixadór Timor-Leste iha Jenebra, António da Conceição “Kalohan”. Imajen Tatoli/António Gonçalves.

DILI, 30 novembru 2023 (TATOLI)—Deputadu bankada PD iha Parlamentu Nasionál, António da Conceição ‘Kalohan’, husu Vise Primeiru-Ministru no Ministru Turizmu no Ambiente ho Ministru Koordenadór asuntu Ekonómiku, Francisco Kalbuadi Lay, atu klafirika kona-ba karta notifikasaun ba dirijente no funsionáriu Institutu Públiku (IP) no Empreza Públika (EP) atu hapara kontratu iha 31 dezembru.

Notísia Relevante:  Ministru Kalbuadi husu funsionáriu hotu atu labele laran taridu

“Iha buat balun ne’ebé bolu ha’u-nia atensaun atu hakarak klarifika uluk hosi Vise Primeiru-Ministru. Ha’u simu kontestasaun barak kona-ba karta ida Vise Primeiru-Ministru nian ligadu ba instituisaun autonoma sira-ne’e, karik oinsá ministru bele konfirma tiha, tanba kestaun polítiku ba ita hotu ba IX Governu em relasaun ba instituisaun sira-ne’e. Karik, intensaun Vise Primeiru-Ministru nian ne’e atu hapara totál ema hotu-hotu ka iha hanoin tanbasá mak atu halo buat ne’e. Se hapara, sé-sé mak para,” Deputadu Kalohan hato’o lihosi audiénsia públika proposta Orsamentu Jerál Estadu (OJE) 2024 iha sala plenária PN, kinta ne’e.

Ho nune’e, nia dehan, públiku no funsionáriu sira bele hetan klareza ne’ebé mak serbisu hela iha instituisaun sira-ne’e, atu labele diminui sira-nia motivasaun hodi bele nafatin presta serbisu iha instituisaun sira-ne’e.

Hatán ba kestaun ida-ne’e, Vise Primeiru-Ministru ba asuntu Ekonomia, Francisco Kalbuadi Lay, hateten lei fó dalan ba membru Governu sira atu hato’o karta notifikasaun refere.

“Pergunta hosi Deputadu António da Conceição nian, halo nusa mak ha’u-nia karta despaixu foin dadauk sai. Ha’u bele hato’o ba públiku lei fó dalan ba ministru hotu-hotu, katak fulan ida antes se ita-boot sira mak iha kontratadu, kazuál sira tenke notifika antes fulan ida,” nia dehan.

Agora iha instituisaun MKAE, Turizmu no Ambiente ne’e ema atus ba atus mak iha ne’eba, no orsamentu seidauk aprova mak se la entesipa ne’e mak to’o iha dezembru 31 ne’e sira hotu sei hela iha ne’eba ne’e sé nia kulpa.

“Entaun di’ak-liu ha’u fó notifikasaun fulan ida antes. Se kuandu ita la hato’o notifikasaun fulan ida antes ne’e, ita sala. Sira bele dehan lae, ami la simu notifikasaun husi ita-boot sira-ne’ebé ami hela de’it hanesan ne’e,” nia hateten.

Maibé, tuir Kalbuadi, la signifika hotu-hotu tenke sei tanba fó ona instrusaun ba instituisaun sira hanesan Institutu Públiku (I.P) no Empreza Públiku (E.P) no ministériu rasik, halo selesaun ba ema-ne’ebé mak halo serbisu di’ak no tékniku duni, hirak ne’e mantein serbisu nafatin.

Nia dehan, barak mós imi bele haree labele taka matan tanba iiha ministériu balun ne’e ema barak demais no balun la tuur tan, hamrik de’it hanesan ne’e iha eskada ba eskada, ne’ebé hanesan instituisaun ka ministériu ida, hakarak ka lakohi ne’e tenke hadi’a.

“Iha ema 200 to’o 300 kuaze serbisu laiha. Maibé labele ne’e mós ita tenke hanoin, tanba ne’e moris loro-loron nian. Hanesan ema, ita mós iha sentimentu maibé hanesan Estadu ita mós implementa buat ida ne’ebé mak tuir lei,” nia dehan.

Jornalista : Nelson de Sousa

Editór        : Cancio Ximenes

Publisidade

Leave a Reply

Latest Post

error: Content is protected !!