Embaxadór Nova Zelandia kondekora ho “Ordem Colar de Timor-Leste”
DILI, 30 novembru 2023 ( TATOLI) – Prezidente Repúblika José Ramos Horta kondekora Embaxadór Nova Zelandia mai Timor-Leste Philip Hewitt ho medalla “Ordem Colar de Timor-Leste”.
Prezidente kondekora diplomata Nova Zelandia ne’e tanba durante nia mandatu iha Timor-Leste kontribui makas ba dezenvolvimentu Timor-Leste nian, liuliu iha pandemia Covid-19, Nova Zelandia apoiu buat barak mai Timor-Leste.
“Embaxadór Philip Hewitt nia dedikasaun ba Timor-Leste makas los, liuliu iha pandemia Covid-19 iha tinan 2020-2021 Nova Zelandia apoiu makas tebes mai Timor-Leste, ami apresia no kongratula ita-boot nia kontribuisaun mai Timor-Leste”, Xefe Estadu Ramos Horta bainhira kondekora ba Philip Hewitt iha Palásiu Prezidensiál, ohin.
Nia dehan, la’os de’it iha pandemia Covid-19 maibé servisu barak mak Philip Hewitt halo durante nia mandatu, kria relasaun di’ak entre Timor-Leste ho Nova Zelandia halo ona kooperasaun iha área oioin iha nasaun ne’e.
Apoiu Nova Zelandia nian mai Timor-Leste iha área oioin ho totál osan liu ona millaun $20 dolar Noza Zelandia nian.
Apoiu Nova Zelandia nian barak liu ba área edukasaun nian hanesan produsaun ba revista Lafaek hodi distribui ba eskola sira hotu iha territóriu nasionál liuliu ba eskola primaria no pre-primaria liuhosi CARE Internasional.
Iha okaziaun ne’e, Embaxadór Philip Hewitt hato’o agradesimentu ba Prezidente Repúblika Ramos Horta no povu Timor-Leste ne’ebé atribui ona medalla “Ordem Colar de Timor-Leste” ba nia.
“Agradese ba Prezidente Repúblika ba povu Timor-Leste hotu ne’ebé mak kondekora ona ha’u, ita sai amigu liután iha prosesu hotu atu luta ba dezenvolvimentu Timor-Leste nian, Nova Zelandia nafatin apoiu Timor-Leste iha área saida de’it hodi ajuda Timor-Leste nia dezenvolvimentu”, Philip konklui.
Jornalista: Hortencio Sanchez
Editór : Zezito Silva
