VIQUEQUE, 01 dezembru 2023 (TATOLI)—Komisaun organizadora komemorasaun loron mundiál ba ai-han iha munisípiu Viqueque organiza marsa saudável, ne’ebé partisipa hosi estudante, funsionáriu inklui entidade relevante seluk hamutuk 200-resin.
Rota ba marsa ne’e hahú hosi kampu futeból Viqueque Vila, ponte Beradek no ramata iha edifísiu Seguransa Sivíl Beloi, ho totál distánsia kilométru 8.
Prezidente komisaun organizadora no atuál Diretór Servisu Seguransa Alimentár munisípiu Viqueque, Adelino Gusmão, konsidera atividade ne’e importante ba ema-nia saúde tanba funsionáriu sira loron-loron okupadu ho serbisu no laiha tempu halo ezersísiu.
“Atividade marsa saudável ne’e hodi festeza loron mundiál ba ai-han ne’ebé monu iha loron 16 outubru, maibé iha preokupasaun balun nune’e agora maka foin realiza. Tanba ne’e, komisaun organiza marsa ne’e ba funsionáriu estudante sira iha postu Viqueque Vila,” Adelino Gusmão, hateten durante abertura marsa iha kampu futeból, Viqueque Vila, sesta ne’e.
Notísia relevante : Administrasaun Viqueque realiza espozisaun no kompetisaun kulinária atu motiva agrikultór
Atividade ne’e partisipa hosi funsionáriu estatál, liña ministeriál sira, profesór, inklui membru Polísia Nasionál Timor-Leste (PNTL) no organizasaun naun govermentál ne’ebé eziste iha Viqueque.
Iha fatin hanesan, responsável ba atividade no atuál Diretór Servisu Edukasaun Viqueque, Domingos Brandão, relata, estudante ne’ebé partisipa iha marsa ne’e hosi Eskola Ensinu Sekundáriu Jerál (ESJ) 04 setembru, Cristal, no Calixa.
“Ohin ne’e ita hotu partsipa iha eventu ne’e tanba importante ba ita-nia saúde, ne’e hanesan marsa amigável no pás entre estudante no funsionáriu sira iha Viqueque,” nia akresenta.
Marsa saudável hahú tuku 07:50 no ramata tuku 10:00, ne’ebé akompaña ho banda hosi ESJ 04 setembru Viqueque.
Tuir observasaun Jornalista Agência Tatoli iha terrenu, nota katak partisipante sira entuziasmu partisipa maski la’o ho distánsia dook.
Jornalista : Vitorino Lopes da Costa
Editora : Julia Chatarina
