Ministériu Saúde prioriza programa tolu iha proposta OJE 2024
DILI, 01 dezembru 2023 (TATOLI)—Ministériu Saúde (MS) fó prioridade ba programa tolu iha proposta Orsamentu Jerál Estadu (OJE) 2024.
“Proposta OJE 2024 Ministériu Saúde propoin kuaze millaun $67. Iha progama tolu ba iha funsionamentu no dezenvolvimentu ba área saúde, kuidadu saúde primária no kuidadu saúde sekundária no tersiáriu,” Ministra Saúde, Elia dos Reis, hateten ba jornalista sira hafoin ramata audénsia públika proposta OJE 2024 ho komisaun F trata asuntu Saúde iha Parlamentu Nasionál, sesta ne’e.
Iha proposta OJE 2024, MS prevee $67.600.906 hodi aloka ba saláriu vensimentu $36.706.970, bens serbisu $13.426.403, transferénsia públika $12.590.400, kapitál menór $2.977.133 no kapitál dezenvolvimentu $1.900.000.
Tuir dokumentu livru proposta OJE 2024 planu anuál serbisu no entidade setór públiku administrativu haktuir, Ministériu Saúde (MS) ho programa dahuluk funsionamentu no dezenvolvimentu instituisionál ho sub-programa neen mak hanesan funsionamentu instituisionál, dezenvolvimentu instituisionál, parseria, apoia desentralizasaun saúde, rejistu serbisu saúde, hosi sub-programa hirak ne’e iha atividade hamutuk 24.
Programa daruak, kuidadu saúde primáriu ho sub-programa lima kompostu hosi pakote serbisu saúde primária abrajente, nutrisaun, saúde materna no infantil, kontrola moras, promosaun edukasaun saúde, hosi sub-programa sira-ne’e iha atividade hamutuk 30.
Programa datoluk, kuidadu saúde sekundáriu no tersiáriu ho sub-programa lima mak hanesan serbisu ospitál referál no munisípiu, serbisu tersiáriu no médiku espesializadu, pakote serbisu abrajente kuidadu saúde ospitalár, emerjénsia médika, jestaun no distribuisaun medikamentu no ekipamentu médiku, hosi sub-programa sira-ne’e hotu ho atividade hamutuk 19.
Jornalista : Nelson de Sousa
Editór : Cancio Ximenes
