DILI, 01 dezembru 2023 (TATOLI) – Nasaun membru Komunidade Ko’alia Lian Portugés (CPLP-sigla portugés) liuhosi konferénsia Ministériu Juventude no Desportu ba dala XIV, iha Luanda, hosi nasaun hamutuk sia aprova ho votu unaminidade ba proposta Timor-Leste (TL) nian ne’ebé husu atu sai uma-na’in ba jogu CPLP iha 2025.
Kandidatura Timor-Leste nian hodi sai uma-na’in ne’e aprezenta direta hosi Ministru Juventude, Desportu, Arte no Kultura, (MJDAK) Nélio Isaac Sarmento no hetan votu unamidade hosi nasaun membru sira hanesan Angola, Brasil, Cabo Verde, Guinne-Bissau, Guinne Equtorial, Mosambique, São Tome e Principe no Portugal.
“Iha konferénsia ne’e, Timor-Leste hakarak no prontu sai uma-na’in ba jogu desportu CPLP nian”, Ministru Nélio Isaac dehan liuhosi komunikadu ne’ebé Agência TATOLI assesu hosi media MJDAK, ohin.
Hafoin deklara kandidatura, Diretor Nasional Desportu MJDAK, Cesarino da Silva halo kedan aprezentasaun ba preparasaun téknika Timor-Leste nian, iha ne’ebé jogu ne’e sei iha kompetisaun ba modalidade sia mak hanesan, Atletizmu, Basketból 3×3, Voleiból Praia, Tenis Kampu, Futeból, Taekwondo, Karate-do no Xadres, inklui mós iha Atletizmu Paralímpiku.
Jogu CPLP ne’e sei implementa iha loron 17-27 Jullu tinan 2025 ne’ebé sei kompete entre nasaun CPLP hotu.
Sekretáriu Estadu Juventude no Desportu Portugal, João Paulo Correia, iha konferénsia ne’e deklara katak Portugal sei fó apoia téknika ba Timor-Leste ba jogu desportiva ne’e.
“Téknikamente, Portugal prontu atu apoiu tékniku ba realizasaun jogu refere ba susesu Timor-Leste nian”, João afirma.
Konferénsia Ministru Juventude no Desportu CPLP ne’e lidera hosi Ministra Juventude no Desportu hosi São Tome e Principe Eurídice Borges Semedo Medeiros.
Iha konferénsia ne’e, MJDAK mos haruka reprezentante juventude hosi Konsellu Nasionál Juventude Timor-Leste, (CNJTL-sigla portugés), ne’ebé reprezenta hosi Clotilde Teresa Soares Guterres (Vise Prezidenti CNJTL no Cesaltina Soares Santos Martins (Pontu Vogal CNJTL ba CPLP.
Jornalista: Hortencio Sanchez
Editór : Zezito Silva
