BAUCAU, 04 dezembru 2023 (TATOLI) – Autoridade Administrasaun Munisipál Baucau hamutuk ho Asosiasaun Defisiénsia Fiar Timor-Leste (ADFTL) segunda ne’e, realiza atividade hodi selebra loron mundiál ema ho defisiénsia iha munisípiu Baucau.
Diretór Ezekutivu ADFTL, José Frederico de Sousa, esplika, atividade la’o-ain ne’e atu selebra loron mundiál ba ema ho defisiénsia inklui fo mensajen ba autoridade no públiku hotu katak maske kondisaun defisiénsia maibé nafatin iha abilidade esforsu hodi festeza loron importante ba ema ho defisiénsia.
“Maske kondisaun defisiénsia labele la’o maibé ho tempu hanesan ne’e ita hakarak halibur hodi kontente netik,” Diretór ADFTL hateten iha Vila Nova, segunda ne’e.
Liuhosi atividade la’o-ain no partisipa hasa’e bandeira iha semana dahuluk fulan-dezembru inklui semináriu nune’e bele fo esperansa kontente ba ema ho defisiénsia liuliu haforsa liután relasaun amizade.
ADFTL hamutuk ho Autoridade Administrasaun Munisipál Baucau kolabora hamutuk ho parseiru dezenvolvimentu sira deside realiza atividade refere ho objetivu atu selebra loron mundiál ba ema ho defisiénsia nu’udar parte akumuladu iha moris sosiedade.
“Ami hakarak hafanu nafatin entidade hotu liuliu governu atubele tau importánsia ba ema ho defisiénsia iha futuru,” José de Sousa akresenta.
Sekretáriu Administrasaun Munisipál Baucau, Simão dos Santos Marques Pinhero, hateten, atividade refere nu’udar parte dignifika ema ho defisiénsia iha munisípiu Baucau ne’ebé parte autoridade sempre apoia no konsidera inportante nune’e kada tinan sempre selebra loron mundiál ba ema ho defisiénsia.
“Fizikamente mak defisiénsia maibé sira nu’udar sidadaun ne’ebé parte hosi prosesu konstrusaun estadu no dezenvolvimentu nasaun, ita presiza mós sira,” Simão Pinheiro hateten.
Autoridade Munisipál Baucau kada tinan prevee ona orsamentu hamutuk rihun $1 hodi apoia ba ADFTL nune’e bele festeza iha loron mundiál ba ema ho defisiénsia.
Partisipa iha selebrasaun loron mundiál ema ho defisiénsia mai hosi Autoridade Administrasaun Munisipál Baucau, parseiru dezenvolvimentu no ema ho defisiénsia kompostu defisiénsia fíziku, matan, tilun no ema ho defisiénsia mentál hamutuk 150.
Jornalista : Natalino Belo
Editór : Evaristo Soares Martins
