DILI, 04 dezembru 2023 (TATOLI) – Governu liuhosi Ministeriu Interiór (MI) ne’ebé lidera hosi Ministru Francisco da Costa Guterres orienta Autoridade Protesaun Sivíl Lautem halo instalasaun bee hosi Valusere ba Illa Jaco, nune’e Russa sira iha ne’ebá bele hemu tanba bailoron naruk rezulta bee maran no Rusa sira hahú mate.Tanba ne’e, Ministru Interiór promete sei buka solusaun lalais hodi sosa mangueira polypipe metru 1500 atu dada bee hosi Valusere mai iha Illa Jaco hodi mantein sustentabilidade bee ba bidon lima ne’ebé antes ne’e hetan apoia hosi lider nasionál Xanana Gusmão iha tinan 2019 liuba.
“Ohin ita hamutuk ho Autoridade Protesaun Sivil no Guarda Florestál sira lalin bee ba tau iha fatin ne’ebé própriu ona inklui observa diretamente rusa tolu ne’ebé foin mate iha oras balu liuba tanba bailoro naruk no korpu bombeiru sira hakoi hotu ona”, hatete Ministru Farncisco liuhosi komunikadu ne’ebé Agência TATOLI asesu, ohin.
Nia dehan, animál fuik liuliu Rusa ne’ebé mate ona iha Illa Jaco tanba impaktu hosi mudansa klimátika ne’ebé agora dadaun iha halo ai-han balada nian mós menus.
“Tuir dadus Guarda florestál katak hahú hosi fulan hat ikus mai to’o loron ohin iha rusa hamutuk 71 maka mate ona. Ida-ne’e la’os de’it kestaun bee maibé ita mós konsidera katak haree ba númeru populasaun rusa hahú aumenta, nune’e hahan iha Illa Jaco la sufisiente ona ba sira, tanba agora ita tama iha tempu bailoron, ne’e duni du’ut sira ne’ebe moris iha ne’e mós hahú maran nune’e prezudika ba rusa sira susar atu konsumu hahan ne’ebé naton”, nia salienta.
Jaco riku ho valór istóriku kulturál no-mós natureza ne’ebé hafutar ho balada fuik oioin ne’ebé atrai turista nasionál no estranjeiru atu ba vizita, ho nune’e Governu sei buka meiu atu konserva no proteje.
“Ita orienta ona Komandu Munisípiu Lautem hamutuk ho Autoridade Protesaun Sivil atu servisu hamutuk ho guarda florestál sira. Agora buat ne’ebé ita bele halo maka fasilita no fó atensaun maka tula bee ba ense iha tangki ne’ebé antes ne’e prepara ona”, subliña.
Jornalista: Hortencio Sanchez
Editór : Zezito Silva
