DILI, 04 dezembru 2023 (TATOLI)-–Primeiru-Ministru (PM), Kay Rala Xanana Gusmão hala’o reuniaun ho Vise-Prezidente Komité Nasionál Xina GX Fundation hosi Hong Kong, Leung Chun Ying, hodi deskute kooperasaun iha setór saúde.
Biban ne’e, PM Xanana agradese tebes ho vizita ne’e tanba bele haree direita situasaun saúde iha Timor-Leste.
“Leung Chun Ying mai hosi Fundasaun ida iha Hong Kong (GX Fundation) sira mai hala’o vizita to’o Baucau ne’ebá hodi haree ita-nia situasaun sira iha klínika no ospitál, ita fó koñesimentu ita-nia situasaun hirak ne’e hotu ba sira no sira sei mai fali hodi foku sira-nia apoiu ba iha área saúde hodi sira bele ajuda ita,” Xefe Governu hateten hafoin enkontru iha Gabinete Fronteira Marrítima, Palásiu Governu, segunda ne’e.
Notísia relevante : Hong Kong hakarak promove Timor-Leste ba Ázia hodi atrai investidór
Iha fatin hanesan, Vise-Prezidente Komité Nasionál Xina GX Fundation hosi Hong Kong, Leung Chun Ying sente onradu bele hasoru direta PM Xanana hodi introdús servisu no misaun fundasaun.
“Ami sente onradu bebes bele mai hasoru Primeiru-Ministru hodi introdús servisu GX Fundation iha Hong Kong, ami hakarak mai kria kooperasaun servisu ho Governu Timor-Leste,” Leung Chun Ying dehan.
GX Fundation nu’udar funsasaun boot ida iha Hong Kong ne’ebé durante tinan barak ona hala’o misaun umana hodi apoia populasaun sira iha nasaun Asosiasaun Nasaun Sudeste Aziátiku (ASEAN, sigla inglés) Áfrika, Médiu Oriente no Pasífiku hodi hala’o operasaun ba ema hirak ne’ebé sofre moras matan (katarata) no moras seluk-tan.
Enkontru ne’e termina ho serimónia entrega prenda, tais, sasán artezenatu no kafé Timor-Leste hosi Primeiru-Ministru Xanana nu’udar símbolu amizade.
Vise-Prezidente Komité Nasionál Xina GX Fundation hosi Hong Kong, Leung Chun Ying, akompaña direta hosi Embaixadora Xina ba Timor-Leste, Wang Wenli.
Jornalista : Antónia Gusmão
Editora : Julia Chatarina
