DILI, 04 novembru 2023 (TATOLI) – Governu Japaun tau ona osan hamutuk $145.984 atu konstrui eskola rua iha munisípiu Covalima no Manufahi iha 2024 hodi garante prosesu aprendizajen ida adekuada ba estudante sira iha futuru.
Embaixadór Japaun iha Timor-Leste, Tetsuya Kimura, hatete edukasaun maka sai baze ida esensiál tebes ba dezenvolvimentu nasaun nian no labarik no joven sira mak sei responsabiliza ba dezenvolvimentu ekonómiku-sosiál país ida ne’e iha futuru.
Tetsuya Kimura salienta mós katak apoia ne’ebé fó ba eskola rua ne’e ninia importánsia atu mellora subsisténsia iha zona rurál. Tanba ne’e, projetu konstrusaun ba ensinu báziku Harekain iha suku Raimean, postu administrativu Zumalai, munisípiu Covalima no eskola sekundária ida ba Fundasaun São Francisco de Assis, iha postu administrativu Fatuberliu, munisípiu Manufahi ne’e atu hadi’ak kualidade no garante futuru ida di’ak ba jerasaun foun timoroan sira-nian. Kada projetu sei hetan $72.992.
Molok Japaun disponibiliza verba ba konstrusaun eskola rua ne’e iha ona projetu barak maka implementa ona iha munisípiu sira, inklui mós iha fatin sira ne’ebé maka susar tebes atu asesu.
”Ha’u vizita tiha ona eskola bázika tolu ne’ebé edifísiu eskola sira ne’e konstrui ho asisténsia finanseira husi Governu Japaun, liuhusi eskema GGP ne’ebé hala’o iha munisípiu Ermera, Ainaro no Bobonaro. Ha’u sente furak tebes hodi hala’o viajen oras ba oras hodi haree hamnasa midar husi labarik estudante sira-nian oin. Sira iha espíritu atu aprende ho espasu eskola ne’ebé mais seguru no kompletu”, diploma relata iha serimónia asina kontratu entre Ministériu Edukasaun no Governu nipóniku ne’ebé realiza iha edifísiu embaixada Japaun, Pantai Kelapa, ohin.
Ezekutivu japonés apoia ona projetu sira ho eskala boot inklui konstrusaun ba infraestrutura indústria sira, nomós projetu eskola ki’ik sira ne’ebé benefisia direta ba komunidade lokál sira no dezempeña papél ida importante tebes iha área hirak ne’e. Konsentra mós ba melloramentu iha espansaun presta servisu sosiál iha Timor-Leste. Ajuda iha setór oioin liuhusi konstrusan edifísiu edukativa, instituisaun saúde no sistema abastesimentu bee-moos.
Liuhusi serimónia asinatura kontratu asisténsia finansiamentu projetu komunitáriu no seguransa umanu ne’e ho objetivu atu benefisia komunidade lokál, liuliu sira iha área remota. Japaun konstrui ona, liu tinan 20, projetu hamutuk 136 iha territóriu.
Iha sorin seluk, Ministra Edukasaun, Dulce de Jesus, agardese ba Governu Japaun, liuhusi Embaixadór Tetsuya Kimura tanba tulun ne’ebé oferese ona atu mellora kualidade edukasaun. Kontrusaun eskola ne’e atu apoia alunu sira bele hetan fatin ida di’ak hodi tuir prosesu aprendizajen ho di’ak liután.
“Ha’u husu ba jestór sira iha eskola rua ne’e bainhira konstrusaun eskola rua ne’e finaliza ona tenke kuída didi’ak edifísiu sira ne’e atubele tulun estudante sira aproveita prosesu aprendizajen ho di’ak”, realsa.
Notísia relevante: Japaun no PNUD disponibiliza millaun $5,1 ba projetu harii no reabilita infraestrutura komunitária
Jornalista: Tomé Amado
Editora: Maria Auxiliadora
