VIQUEQUE, 04 dezembru 2023 (TATOLI)—Polísia Nasionál Timor-Leste (PNTL) munisípiu Viqueque komprometidu sei kumpre orientasaun Komandu Jerál hodi partisipa juramentu ne’ebé sei realiza iha loron nasionál invazaun iha loron 07 dezembru 2023, iha Palásiu Governu.
“Relasiona ho orientasaun hosi Komandu Jerál, ne’ebé fó despaixu ba ami PNTL munisípiu, nune’e ami kumpre despaixu no sei ezekuta orden. Ami la halo identifikasaun ba membru hira maka envolve-an iha grupu arte-marsiál no grupu arte-rituál, maibé ha’u orienta ona ba Eskuadra lima atu membru sira ho konsiénsia de’it ba partisipa juramentu,” Komandante PNTL munisípiu Viqueque, Superentendente, João da Costa, informa iha resintu Administrasaun Viqueque, segunda ne’e.
Biban ne’e, nia husu membru PNTL ne’ebé iha tempu okupasaun Indonézia envolve karik, ho konsiénsia tenke halo juramentu tanba membru Polísia atu serbí nasaun no povu.
“Ba ema individuál sira ne’e ita labele hatene, karik sente envolve ba organizasaun arte-marsiál, di’ak liu ita kumpre orden komandu ba tuir juramentu no simu orientasaun ruma ne’ebé sei realiza iha loron 07 fulan dezembru. Tanba juramentu ne’e di’ak ba ita-nia rai no ba futuru,” nia akresenta.
Notísia relevante : Membru F-FDTL foun 598 ofisialmente juramentu ba bandeira RDTL sai lutu nasaun
Membru Polísia Viqueque sei fahe ba ekipa rua, ida sei halo seguransa iha Viqueque durante vizita Amu Bispu Baucau, Don Leandro Maria Alves, iha loron 07 dezembru no ekipa ida sei desloka bá nasionál.
Tuir dadus, kada postu iha membru Polísia na’in-lima inklui Komandante mak sei partisipa serimónia juramentu iha nasionál.
Bazeia ba orientasaun hosi Primeiru-Ministru, Kay Rala Xanana Gusmão, liuhosi Ministru Interiór, Francisco Guterres, katak membru PNTL ne’ebé envolve iha Grupu Arte-Marsiál (GAM) no Grupu Arte-Rituál (GAR) tenke halo juramentu hodi serbisu independente no profisionál, la’ós depende ba grupu.
Tuir rezolusaun Governu númeru 45/2023, 10 novembru, determina suspensaun kona-ba ensinu apredizajen no prátika arte-marsiál ho adosaun medida hodi asegura orden públiku. Suspensaun ne’e halo tanba akontese insidente foin lalais iha fatin balun iha territóriu nasionál.
Hosi totál insidente 54 ne’ebé rejista maka ema sira-ne’ebé mate hamutuk na’in-haat no kanek todan na’in-26, ho estragu sasán hanesan uma 21 no veíkulu (karreta no motorizada) sanulu.
Membru PNTL Viqueque ne’ebé serbisu efetivu hamutuk na’in-139, ne’ebé destaka iha postu Eskuadra lima hanesan postu Viqueque Vila, Lacluta, Ossu, Uatulari no Uatucarbau.
Jornalista : Vitorino Lopes da Costa
Editora : Julia Chatarina
