DILI, dezembru 2023 (TATOLI)—Pároku igreja Santo Antonio Motael, Pe. Mariano Maia, hateten sosiedade timorense atu prudente iha hahalok no sensível ba asaun tanba Papa Francisco nia orasaun ba evanjelizasaun iha fulan-dezembru ne’e mak husu sarani sira reza ba ema ho defisiénsia (EhD) sira.
“Fulan-dezembru mak fulan ida-ne’ebé ita hanoin espesiál ba ita-nia maluk ema ho defisiénsia sira. Nia objetivu, atu sosiedade hatene tau-matan no tulun sira, instituisaun sira promove programa kona-ba inkluzaun, ne’ebé valoriza ema ho defisiénsia sira-nia partisipasaun ativa iha sosiedade, basá ema hotu-hotu kriatura MAROMAK-Nian. Ema ida laiha razaun atu hewai ema seluk, ema iha razaun atu dignifika malu,” Pe. Mariano Maia hateten iha nia omilia bainhira prezide misa agradesimentu ba selebraaun loron mundiál ba ema ho defisiénsia sira, liuhosi komunikadu imprensa ne’ebé Agência Tatoli asesu, segunda ne’e.
Entretantu, nia hatutan, Arsebispu Arkidioseze Metropolitana Dili, Dom Virgílio kardeal do Carmo da Silva, nia intensaun ba fulan-dezembru mak reza ba inan isin-rua sira.
“Ita atu prepara-aan ba iha Adventu ba festa Natal nu’udar festa moris nian, tanba Adventu mak tempu ne’ebé folin ba ita atu prepara-aan, fase-aan, hamoos-aan, hadia-aan hodi simu ida-ne’ebé atu mai moris iha ita-nia leet. Tempu Adventu liga ho mensajen ba dominggu ida-ne’e mak, “Matan Moris, Neon Na’in”. Ida-ne’e hatudu sentidu katak, lilin dahuluk adventu nian mak lilin naroman atu leno ita-nia Matan Moris, Neon Na’in,” nia esplika.
Matan Moris katak ema hotu-hotu bele haree maibé la’ós ema hotu-hotu bele fihir, ema hotu-hotu bele haree maibé la hatene haree tanba haree ho matan ne’e baibain, maibé haree ho matan-fuan ne’e ema estraordináriu.
Padre dehan, matan moris signifika vijilante, adventu, atensaun, foku, book-aan lalais no sensível tanba matan moris no neon na’in mós iha sentidu ba loron mundiál ema ho fefisiénsia nian, ne’ebé ninia mensajen prinsipál ida maka “Timor-Leste ida-ne’ebé Inkluzivu, Prósperu, Reziliente, Sustentavel no Asesivel”.
“Maibé dala ruma tanba ita-nia matenek halo ita esklui ema seluk liuliu maluk sira Ema ho Defisiénsia. Ita esklui Ema ho Defisiénsia iha sosiedade tanba ita-nia foti-aan. Tanba ne’e tempu adventu ida-ne’e nu’udar tempu inklui ema seluk iha ita-nia moris, atu dignifika malu, respeita malu iha moris loron-loron nian,” nia hateten.
Entretantu, nia esplika, neon na’in katak prudente ne’ebé signifika la’ós matenek tanba ema hotu-hotu matenek maibé la prudente.
“Tanba ne’e, iha ita ema moris tenke matenek no prudente, atu nune’e bele iha balansu. Tanba keta halo ita matenek iha ulun de’it maibé la-matenek iha fuan. Nune’e ema wain intelijiete tebes maibé la prudente,” nia dehan.
Jornalista : Osória Marques
Editór : Cancio Ximenes
