DILI, 18 Juñu 2026 (TATOLI)—Diresaun Nasaionál Transporte Terrestre (DNTT) liuhusi Xefe Departamentu Sekretariadu Apoiu Tékniku Administrasaun DNTT, Nelson Sequeira, klarifika katak implementasaun dekretu-lei nú.17/2026 kona-ba taxa administrativa ba transporte públiku sira-ne’e laiha intensaun atu fó presaun ba públiku iha situasaun krize nia laran.
Notísia Relevante: Ramos-Horta preokupa ho taxa administrativa ba transporte hatodan povu nia moris
Kona-ba taxa administrativa, nia hateten, dekretu-lei nú.17/2026 ne’e halo tuir dalan tanba liuhusi prosesu lubuk ida mak hanesan Ministériu lori ba Konsellu Ministru aprova tiha mak hafoin lori fali ba Prezidente Repúblika hodi promulga.
“Ha’u mós hakarak fó hatene katak kona-ba tranasporte públiku liga ho dekretu-lei ida-ne’e ho diploma ida uluk lahanesan no ida-ne’e di’ak-liu, tanba ninia prazu ba inspesaun ne’e lahanesan ida uluk to’o de’it fulan neen. Maibé, ida agora ne’e bele to’o tinan ida,” Xefe Departamentu ne’e informa ba Agência Tatoli, ohin.
Iha biban ne’e, nia mós fó ezemplu katak transporte públiku hanesan mikrolet sira-ne’e ba halo inspesaun selu taxa $20 maibé ninia prazu ne’e to’o de’it fulan neen no liu loron ida mak nia sei selu multa to’o $120, maibe dekretu-lei ida agora ne’e lae tanba inspesaun ba transporte públiku sira selu $35 no ninia prazu to’o tinan ida.
“Enkuantu, bainhira transporte ne’e kona multa $70 aumenta tan taxa administrativa $35 ne’e, nia selu hamutuk $105 maibé ne’e to’o tinan. Diploma uluk ne’e lae, liu loron ida de’it sei selu $120. Ami hanesan parte tékniku komprende públiku sira-nia situasaun ida-ne’e tanba sira ladun hatene,” nia esplika.
Tuir nia, diploma ida-ne’e halo antes mosu situasaun krize ka afeta husi funu iha médiu oriente, ne’ebé laiha ligasaun ho krize no implementasaun ne’e mak foin hahú, nune’e diploma ne’e ketak ida no krize ne’e ketak ida.
Antes ne’e, avizu ne’ebé fó sai husi DNTT haktuir katak dekretu-lei ne’e implementa ona iha loron 10 Juñu 2026 ho taxa inspesaun ne’ebé aumenta sa’e mak hanesan; Motorista ho taxa administrativa babain ne’e $14, maibé bainhira data inspesaun liu prazu ka mate ne’e sei selu multa $42 (14X3=42).
Karreta Kiik (Automóvel, station wagon, carrinha) ne’e ninia taxa administrativa babain ne’e $28 maibé bainhira data inspesaun liu prazu ka mate ne’e sei selu multa $84 (23X3=84).
Karreta Boot (Mini Kamioneta, Kamioneta) ne’e ninia taxa administrativa baibain ne’e hamutuk $42 maibé bainhira ninia data inspesaun liu prazu ka mate ne’e sei selu multa $126 (42X3=126).
Notísia Relevante: DNTT sei aplika taxa administrativa foun ba transporte sira iha 10 Juñu
Jornalista : Alexandra da Costa
Editór : Cancio Ximenes
