iklan

NASIONÁL, HEADLINE, KAPITÁL

PM Xanana husu juventude hola parte iha kompetisaun harii prezépiu natál

PM Xanana husu juventude hola parte iha kompetisaun harii prezépiu natál

Primeiru-Ministru, Kay Rala Xanana Gusmão. Imajen Tatoli/Egas Cristóvão

DILI, 04 dezembru 2023 (TATOLI)–Primeiru-Ministru (PM), Kay Rala Xanana Gusmão, husu ba juventude sira iha munisípiu hotu atu partisipa iha kompetisaun harii prezépiu hodi selebra natal no tinan foun 2024.

PM xanana sei delega ekipa hodi hala’o vizita bá munisípiu no bairru idak-idak atu halo avaliasaun ba prezepiu nune’e bele haree ida ne’ebé di’ak liu bele hetan prémiu hosi Governu.

“Ha’u apela ba juventude iha Dili no munisípiu hotu iha kada suku, imi hola parte ba tuir kompetisaun harii prezépiu natál hanesan uluk halo tiha ona. Ho ida-ne’e sei fó prémiu primeiru to’o quinto lugar ne’e ba prezépiu di’ak liu,” Xefe Governu hato’o apelu ne’e liuhosi nota ne’ebé Agência Tatoli, segunda ne’e.

Notísia relevante : Harii prezépiu Natal tenke ho distánsia metru 10 hosi estrada

PM fó hanoin, bele halo prezépiu maibé ho kondisaun, juventu iha suku laran tenke harii pás ho domin, labele tuku malu no estraga malu, tanba suku ida la marese hetan premiu maski manám, bainhira ema baku no tuku malu.

Xanana husu atu juventude sira idak-idak atu hatudu sira-nia kreatividade no dezeña prezépiu labele uza materiál besi no tenke konstrui uma prezépiu ho materiál tradisionál hanesan ai ka au, du’ut hali abut no pinta prezépiu natál no Menino Jesus bele uza kor oin-oin hodi hafurak uma prezepiu ho diak.

Governu sei koordena ho Komandu Jerál Polísia Nasionál Timor-Leste (PNTL) atu halo kontrolu ba kualker prezépiu natál ne’ebé harii besik estrada labele tuur no hemu tua iha laran.

Aleinde ne’e, Governu la permite atu juventude sira kria konflitu durante selebrasaun loron santu natál no tinan foun. Tanba loron ne’e atu lori moris dame no ksolok ba ema hotu.

Daudaun ne’e Governu mós harii ona prezepiu iha Palasiu Governu no Palásiu Prezidensiál Prezidente Nicolau Lobato Dili, inklui jardin sira iha sidade Dili komesa monta ona lampu oin-oin hodi hafurak ambiente natál no tinan foun.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!