DILI, 05 dezembru 2023 (TATOLI) – Asosiasaun Dalan ba Naroman apoia ekipamentu sir aba protesaun hanesan farda no kapasete no kanuru ki’ik no bo’ot, rede no karosa hodi uza ba suru no pineira inklui tula rai-henek ba benefisiáriu na’in-15.
“Asosiasaun fó ema ida item ida, maibé kanuru suru rai henek bo’ot no ki’ik mak rua. Benefisiáriu sira ne’e husi suku Komoro no Madohi hamutuk 15 ne’ebé durante ne’e halo atividade kee no suru rai henek iha Mota Comoro. Kada ema ida hetan item hamutuk 10”, Vise Diretór Ezekutivu, Jeronimo Fernandes, hateten ba Agência TATOLI iha Bebonuk.
Nia afirma ekipamentu no material portesaun ne’e sosa ho bazea ba apoia finanseiru hosi Serviços de Apóio á Sociedade Civil e Auditoria Social (SASCAS-VPM) ho totál $10.000 ne’ebé assosiasaun halo mós ba atividade sensibilizasaun ba populasaun kona-bá kuidadu meiu ambiente.
“Sura husi 2022 to’o mai agora, ami fó ona apoiu ba benefisiáriu na’in 144 ne’ebé suru rai henek iha mota laran”, nia afirma.
Iha fatin hanesan, Benefisiáriu Mateus Coelho hato’o agradesementu ba Asosiasaun Dalan ba Naroman tanba bele fó apoiu ekipamentu hodi bele hala’o atividade loron-loron hanesan pineira rai henek iha mota laran.
“Ha’u foin primeira vez simu apoiu ne’e. Ida ne’e ajuda ha’u atubele servisu suru rai henek hodi faan atubele nesesita ami nia morisa lor-loron nian”, nia agradese.
Jornalista: Jesuína Xavier
Editór : Florencio Miranda Ximenes
