COVALIMA, HEADLINE

FAO valida AVRP no lansa relatóriu jestaun risku ba dezastre iha Mape no Raimea

FAO valida AVRP no lansa relatóriu jestaun risku ba dezastre iha Mape no Raimea

Koordenadór Jestaun Risku ba Dezastre FAO, Lourenço Cosme Ximenes. Imajen Tatoli/Celestina Teles.

COVALIMA, 05 dezembru 2023 (TATOLI) – Organizasaun Nasaun Unida ba Alimentasaun no Agrikultura (FAO, sigla inglés) no autoridade Covalima halo validasaun ba relatóriu Avaliasaun Vulnerabilidade Risku ba Perigu (AVRP) no lansa relatóriu kona-ba planu jestaun risku ba dezastre naturál iha Suku Mape no Raimea, iha postu Administrativu Zumalai, munisípiu Covalima.

Koordenadór Jestaun Risku ba Dezastre FAO, Lourenço Cosme Ximenes, hateten FAO hala’o nia programa rejiliénsia faze daruak iha suku Mape no Raimea ne’ebé selesionadu nu’udar alvu hodi implementa atividade Jestaun Risku ba Dezastre (JRD).

“Programa ne’e hahú halo avaliasaun vulnerabilidade risku ba perigu no dezenvolve planu jestaun risku ba dezastre no integra iha planu jestaun risku dezastre ne’ebé hetan apoiu tékniku husi Ministériu Interiór, liuhusi Autoridade Protesaun Sivíl, Ministériu Agrikultura no FAO”, dehan.

Bazeia ba avaliasaun katak komunidade suku Mape no suku Raimea identifika perigu ba risku dezastre naturál ho tipu neen hanesan risku boot ba inundasaun, bailoro naruk, risku médiu hanesan peste ai-horis no anin-boot no risku ki’ik mak konflitu, rai-nakdoko no atake lafahek.

Atu hakle’an identifikasaun ba perigu maka ekipa téknika kompostu husi Ministériu Agrikultura no Peska, Diresaun Nasionál Jestaun Risku ba Dezastre no FAO halo mós komparasaun ba dadus liuhusi validasaun no analiza dadus istóriku eventu dezastre iha Timor-Leste inklui ho mapa google earth.

FAO hala’o nia atividade hahú iha 2019 to’o ohin loron ne’ebé iha tinan kotuk hala’o programa pro rejiliénsia ne’ebé kobre suku tolu hanesan Tashilin, Zulo no Fatuleto.

Iha tinan ne’e, FAO hala’o nia programa iha suku Mape no Raimea hodi halo validasaun relatóriu hodi haree ba vulnerabilidade hanesan sosiál, fíziku, ambiente no ekonómia liga ba risku dezastre ne’ebé identifika perigu saida maka iha suku refere.

“Ita sukat sira-nian kapasidade oinsá komunidade afeta risku, hahú preparasaun to’o situasaun responde emerjénsia hafoin rekuperasaun”, esplika.

Diretór Servisu Munisipál ba Protesaun Sivíl Jestaun Dezastre Naturál, Quintino da Costa, hatete iha suku alvu lima ne’ebe tolu implementa ona iha tinan kotuk no rua seluk FAO halo ona validasaun no halo ona planu asaun anuál atu implementa.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!