MACLN kontinua halo levantamentu dadus ba ema mate iha funu laran

DILI, 05 dezembru 2023 (TATOLI)–Ministru Asuntu Kombatente Libertasaun Nasionál (MACLN, sigla portugés), Gil da Costa Monteiro “Oan Soru”, hateten iha tinan 2024 mai ne’e MACLN kontinua halo levantamentu dadus ba ema-ne’ebé mate iha períodu funu iha 1974-1999 iha territóriu nasionál.
Notísia Relevante: MAKLN tau prioridade ba levantamentu dadus ema mate tanba funu
“Iha 2024 nian mak ami sei hala’o levantamentu no halo verifikasaun ba ema-ne’ebé mate iha territóriu laran ho dala ida de’it, tanba dadus ne’ebé mak hosi uma-lisan kuaze 1% mak ami seidauk foti no ami sei foti hotu iha 2024,” Oan Soru hateten ba Agência Tatoli hafoin halo audiénsia ho Komisaun F, trata asuntu saúde, seguransa sosiál, no igualdade jéneru iha Parlamentu Nasionál (PN), segunda ne’e.
Oan Soru hateten, uma-lisan balun iha munisípiu Liquiça nian seidauk foti hotu maibé atu dehan de’it katak uma-lisan hamutuk 100-resin mak seidauk foti no 16.000 mak foti ona, tanba ne’e iha tinan 2024 sei konklui restante ne’e.
“Ita laiha programa foun iha 2024, no kontinua de’it programa antes ne’ebé mak iha ona ne’e,” nia dehan..
MACLN aprezenta Orsamentu Jerál Estadu (OJE) 2024 ba Komisaun F, Parlamentu Nasionál ho nia montante millaun $113 ne’e, nia rubrika normál hanesan baibain ba saláriu no vensimentu no ba bens servisu sira, kapitál dezenvolvimentu no transférensia públika.
Membru Governu ne’e hatetetn, ko’alia kona-ba programa no planu prioridade mak asuntu veteranu ne’e ema hotu hatene mak ba verifikasaun sira, haree polítika haloot restu mortál, jardin ba erói sira no fundu veteranu nian ne’ebé mak la’o hela ne’e.
“Ida-ne’e ami sei hala’o iha tinan 2024,” nia dehan.
Notísia Relevante: Membru PN preokupa verifikasaun dadus veteranu rejistadu 2009
Jornalista : Osória Marques
Editór : Cancio Ximenes

