COVALIMA, HEADLINE

MCI divulga polítika Governu ba dezevolvimentu ekonómiku nasionál

MCI divulga polítika Governu ba dezevolvimentu ekonómiku nasionál

MCI divulga polítika Governu ba dezevolvimentu ekonómiku nasionál. Imajen/Celestina Teles.

COVALIMA, 05 dezembru 2023 (TATOLI) – Ministériu Komérsiu no Indústria (MCI, sigla portugés) divulga polítika IX Governu kona-ba dezenvolvimentu setór ekonómiku nasionál, liuhusi semináriu ne’ebé foku ba área komérsiu no indústria iha munisípiu Covalima.

Vise-Ministru Komérsiu no Indústria, Augusto Junior Trindade, hateten programa divulgasaun ba polítika Governu konstituisionál la’ós foin maka halo maibé realiza uluk ona iha Ermera, Viqueque, Manatuto no Ainaro.

“Atividade divulgasaun informasaun sobre polítika IX Governu kontituisionál ne’e fó prióridade ba pilár dezenvolvimentu ekonómiku oinsá atu haree no konsolida forsa hamutuk atu aselera iha tinan 2024 servisu komérsiu no indústria”, governante ne’e dehan iha salaun Autoridade Munisípiu Covalima.

Governu tenke rona opiniaun husi autoridade lokál no parte hotu nia situasaun ne’ebé hasoru iha área ekonómika hafoin halo diagnóstika hodi haree prióridade bazeia ba realidade iha terrenu.

Vise-Ministru ne’e realsa katak Governu rona opiniaun husi autoridade lokál no emprezáriu sira durante fulan lima nia laran no konsege hamosu ona lei sira hanesan lei baze indústria, baze komérsiu, lei dezenvolvimentu indústria, lei protesaun konsumidór, komérsiu eletróniku no propriedade intelektuál.

Aleinde hala’o semináriu, vise-ministru mós hala’o vizita bá merkadu rua iha Covalima hodi haree nia kondisaun. Objetivu husi vizita ba merkadu rua ne’e relasiona ho relatóriu ne’ebé husi reprezenta Administradór Munisípiu Covalima katak kondisaun merkadu laiha ijiene ba negosiánte sira.

Reprezenta Administradór Munisípiu Covalima, Francisco de Jesus Alves, hatete  Covalima hanesan munisípiu ne’ebé sai odamatan ba movimentu ekonómia Timor-Leste, maibé povu sira kontinua halerik ba presu nesesidade bázika nomós merkadu rua laiha ijiene.

“Ha’u hakarak hato’o kondisaun merkadu rua iha munisípiu Covalima presiza iha intervensaun tanba ladún di’ak”, salienta

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!