COVALIMA, 05 dezembru 2023 (TATOLI) – Autoridade iha Covalima komemora Loron Mundiál ba Ai-han ho atividade kompetisaun kulinária ba grupu sira ne’ebé mai husi postu administrativu sira hodi promove gastronomia lokál.
Asesór Sekretáriu Estadu Pekuária, Quintiliano Fernandes Barros, hatete kompetisaun te’in ai-han lokál ne’e hanesan meiu ida atu asegura ai-han nutritivu ba konsumidór sira.
“Atu hasa’e kulidade ai-han ne’e hanesan meiu ida oinsá atu promove inan-feto sira ne’ebé iha ona koñesimentu kona-ba produtu lokál hodi enovolve sira ne’ebé seidauk hatene produsaun ai-han ne’ebé iha nutrisaun di’ak ba ema nia saúde”, dehan iha salaun Covec Bairru Costa, ohin.
Kompetisaun kulinária ne’e partisipa husi grupu kulinária hitu hanesan Raiketan husi postu administrativu Fatumea, Nutetu Fohorem husi postu administrativu Fohorem, Holba husi Fatululik, Faomanila husi Tilomar, Haburas Goronto husi Maucatar, Bairo Cray husi Suai no Hadomi Nutrisaun husi Zumalai hodi aprezenta sira-nia produtu lokál. .
Aleinde kompetisaun kulinária hala’o mós atividade fahe informasaun oinsá atu eleva agrikultór sira-nia koñesementu hodi hasa’e produsaun iha rai-laran hanesan batar, foos no ai-han lokál sira seluk.
Iha sorin seluk, Diretór Servisu Munisipál Seguransa Alimentár, Domingos Gusmão, hateten kada tinan mundu tomak komemora Loron Mundiál ba Ai-han ne’ebé monu iha 16 outubru. Tanba iha kestaun seluk maka Covalima foin komemora loron iha 05 dezembru.
“Ita komemora Loron Mundiál Ai-han atu promove grupu kulináriu oinsá pratika seguransa ai-han di’ak hodi garante hahán ho valór nutritivu ba ita-nian saúde no promove grupu kulináriu oinsá dezenvolve sira-nia negósiu hodi fornese ai-han ba komunidade ho nutritivu”, esplika.
Loron Mundiál ba Alimentasaun selebra kada tinan, dezde 1981, 16 outubru. Data ne’e komemora iha nasaun 150 ho objetivu alerta no konxiensializa opiniaun públika ba kestaun sira globál relasionada ho alimentasaun no nutrisaun.
Jornalista: Celestina Teles
Editora: Maria Auxiliadora
