iklan

HEADLINE, SOSIEDADE SIVĺL

Aban, CNC, I.P no asosiasaun Venu organiza festivál kulturál rezisténsia populár

Aban, CNC, I.P no asosiasaun Venu organiza festivál kulturál rezisténsia populár

Diretór Ezekutivu CNC, I.P, Hugo Maria Fernandes. Imajen Tatoli/Egas Cristóvão

DILI, 06 dezembru 2023 (TATOLI)-Centro Nacional Chega, Institutu Públiku (CNC,I.P) no asosiasaun Venu, iha kinta (07/12) sei organiza festivál kulturál rezisténsia populár hodi komemora loron invazaun Indonézia mai Timor-Leste.

Diretór CNC, I.P, Hugo Maria Fernandes, hateten, tinan ne’e sei foti ho tema ‘funu, memória no trauma ba eperansa’, ne’ebé korresponde ho vizaun no misaun Venu nian, tanba asosiasaun ne’e halo serbisu iha área arte no múzika ne’ebé haree katak elementu rua ne’e importante hodi harii dame, tantu ba individuu nomós koletivu iha komunidade nia le’et.

“Objetivu prinsipál hosi festivál kulturál ne’e maka atu kontribui ba prosesu harii dame no rekonsiliasaun atu atinje meta boot Centro Chega! nian katak sosiedade la repete filafali violénsia pasadu nian,” Hugo Maria Fernandes, dehan liuhosi konferénsia imprensa ne’ebé hala’o iha salaun CNC, Balide, kuarta ne’e.

Atividade ne’e hanesan eventu públiku ne’ebé sei hatudu kreatividade artí0stika kontemporanea oin-oin, ne’ebé mak esplora efeitu psikolójiku hosi funu ba timor-oan nia moris loron-loron nian ka vida umana ne’ebé moris ho memória kona-ba funu no violénsia pasadu iha ninia kakutak.

Festivál ne’e hanesan kreatividade artístika ne’ebé demonstra liuhosi pinta, instalasaun ka projesaun, eskultura, teatru, poezia, monólogu, múzika esperimentál ka kombinasaun entre forma artístika oin-oin hodi kria arte performativa ne’ebė hamosu efeitu májiku ida.

“Atividade sira ne’ebé sei hala’o iha festivál hodi hamosu efeitu kura kanek kompleta ho palku prinsipál tolu mak hanesan palku memória, palku fitar, no palku esperansa. Aleinde ne’e, entre palku hirak ne’e sei instala mós palku livre nomós área play ground ba labarik sira,” Diretór CNC, I.P esplika.

Notísia relevante : SEAK-CNC konvida ema hotu partisipa iha eventu festivál kulturál

Palku Memória sei instala iha área tasi ibun Casa Europa nian, ne’ebé dezeña atu sai hanesan espasu ba reflesaun ne’ebé mak lori ema ba hanoin hikas situasaun iha pasadu, maibé ho aprosimasaun ne’ebé kama’an, katak subtil no la vulgar.

Atividade artístika iha palku ne’e dezeña atu hamosu efeitu refere. Atividade hirak ne’e inklui instalasaun artístika kona-ba memória pasadu, konsertu múzika akústika, no deklamasaun poezia.

Palku Fitar ninian sei instala iha resintu eis Cámara Eclesiastica, kobre areadór Gloaria Jeans. Palku ida-ne’e dezeña nu’udar parte ida hosi ezebisaun artístika ho tema fitar kle’an ne’ebé hatudu obra sira ne’ebé mak espresa vida umana ne’ebé moris ho memória kona-ba funu no violénsia pasadu nian iha ninia kakutak. Ezebisaun artistíka ne’e instala iha parte laran Eis Camara Eclesiastica no parte ne’e tomak sei dezeña nu’udar instalasaun ida mak hamosu situasaun melankolia, haklean ho noise sound experimental.

Enkuantu, iha área liur (areador Gloaria Jeans) nian mak instala palku fitar ne’ebé sai nu’udar palku ba kura-kanek. Nune’e bainhira ezebisaun artístika tenta atu sai hanesan espellu hodi reflete situasaun traumátiku sira iha palku fitar ema hetan hakmatek, enkorajamentu, no laran metin nafatin.

Kona-ba palku esperansa sei instala iha resintu Portu Dili. Palku ne’e entende atu sai nu’udar espasu ne’ebé nakonu haksolok no eperansa. Palku ne’e dezeña hanesan área ba divertimentu nian, tan ne’e palku ne’e mak sei sai hanesan palku boot iha-ne’ebé banda boot sira sei anima iha durasaun naruk. Aleinde ne’e, iha mos atividade artistíka no divertimentu seluk.

Festivál kulturál rezisténsia populár hanesan parte ida hosi programa memorializasaun integradu. Festivál ne’e mos nu’udar aprosimasaun kulturál ida mak liuhosi aprezenta memória koletiva ho meiu kreativa iha forma artístika oin-oin, bele sai nu’udar espasu refletivu no didátika ida ba harii dame no rekonsiliasaun.

Iha fatin hanesan, Diretór Asosiasaun Venu, Ananias, hateten, festivál kulturál rezisténsia populár 2023 ne’e hahú iha loron 07 dezembru no sei ramata iha loron 10 dezembru nu’udar loron mundiál ba Direitu Umanu.

Partisipante hosi festivál kulturál rezisténsia populár ne’e mak sobrevivente no vítima sira konflitu pasadu, juventude, estudante hosi nível sekundária to’o universitáriu, komunidade jerál, grupu ekonómia kreativa, grupu artezenatu, grupu artista, turista internasionál sira, akadémiku, diplomata, ajente Governu, no sosidade sivíl sira.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!