Top

Audiénsia públika ba proposta OJE 2024 konklui ona

Prezidente Komisaun C trata asuntu Finansa Públika iha Parlamentu Nasionál (PN), Cedelízia Farria dos Santos. Imajen Tatoli/Egas Cristóvão.

DILI, 06 dezembru 2023 (TATOLI)—Komisaun espesializada sira iha Parlamentu Nasionál (PN) halo audiénsia públika ho Governu ba proposta Orsamentu Jerál Estadu (OJE) 2024 konklui ona iha tersa (05 dezembru 2023) horisehik.

“Ita hatene katak, pedidu ba OJE 2024 mai ho kategória urjénsia, tanba ne’e nia prosesu sira habadak. Entaun, horisehik ne’e komisaun hotu-hotu iha PN konklui ona ami-nia audiénsia ho liña ministeriál hotu-hotu inklui Prezidénsia Repúblika no Tribunál Rekursu,” Prezidente Komisaun C trata asuntu Finansa Públika, Cedelizia dos Santos, hateten ba jornalista sira iha uma fukun PN, kuarta ne’e.

Komisaun espesializada sira hala’o audiénsia públika ho liña ministériu sira durante loron haat ne’ebé termina iha tersa (05/12/2023, nune’e komesa hosi ohin komisaun to’o segunda semana oin, komisaun sira prepara relatóriu paresér setoriál inklui paresér komisaun C rasik ho rekomendasaun sira hafoin aprova hodi envia ba meza Prezidente Parlamentu Nasionál.

Tuir kalendáriu sei hala’o debate ba proposta OJE 2024 iha faze jeneralidade durante loron rua ne’ebé sei realiza iha tresa-kuarta (12-13 dezembru) semana oin ne’e hodi kontinua debate faze espesialidade durante loron lima nia laran.

“Tuir kalendáriu iha 21 dezembru aprovasaun versaun finál ba Orsamentu Jerál Estadu 2024 no iha 22 dezembru ita haruka ona ba Prezidente Repúblika atu promulga,” nia hateten.

Enkuantu, iha loron 23 fulan-novembru ne’e Governu liuhosi Ministériu Finansa, aprezenta ona proposta-lei Orsamentu Jerál Estadu (OJE) 2024 ho montante biliaun $1,95 ba Parlamentu Nasionál (PN) ho debate karáter urjénsia.

Proposta-lei OJE ne’e aprezenta hosi Ministra Finansa, Santina Cardoso, no akompañadu hosi Vise Ministru ba asuntu Parlamentár, Adérito Hugo da Costa no Vise Ministra Finansa, ne’ebé simu direta hosi Prezidente Parlamentu Nasionál, Maria Fernanda Lay, akompaña mós hosi kompozisaun meza PN iha uma fukun PN.

Antes ne’e loron 21 fulan novembru ne’e Konsellu Ministru hala’o sorumutuk iha Palásiu Governu no aprova ona projetu Proposta Lei Orsamentu Jeral Estadu (OJE) ba tinan 2024, ne’ebé aprezenta husi Ministra Finansas, Santina José Rodrigues F. Viegas Cardoso, ho valór totál konsolidadu billaun $ 1,95 ba Administrasaun Sentrál, RAEOA no Seguransa Sosiál, sein Fundu Rezerva Seguransa Sosiál.

Valór ida-ne’e inklui dotasaun millaun rihun $1,83 ba administrasaun sentrál no millaun $60 uza ba RAEOA.

Hosi montante totál despeza ne’ebé prevee ba Administrasaun Sentrál no RAEOA, millaun $468,8 uza ba saláriu no vensimentu, millaun US$ 386,3 ba bens no servisu, millaun $589,7 ba transferénsia públika, millaun $34,2 ba kapitál menór no millaun $411 ba kapitál dezenvolvimentu.

Orsamentu Seguransa Sosiál, inklui Fundu Rezerva Seguransa Sosiál, iha montante millaun $347,6.

Iha OJE tinan 2024 prevee ho valór millaun $788,2 ba asuntu ekonómiku, millaun $467,1 ba protesaun sosiál, millaun $140,9 ba edukasaun, millaun $ 66,2 ba saúde no millaun $45,2 ba abitasaun no infraestrutura koletiva.

Jornalista : Nelson de Sousa 

Editór         : Cancio Ximenes 

Publisidade

Leave a Reply

Latest Post

error: Content is protected !!