Governu lansa projetu instalasaun transformadór foun iha Liquiça
LIQUIÇA, 06 dezembru 2023 (TATOLI) – Ministériu Obras Públiku (MOP) hamutuk ho Sekretáriu Estadu Eletrisidade Agua no Saneamentu (SEEAS), Eletrisidade Timor-Leste Empreza Públika (EDTL,EP) no kompaña internasionál TBEA realiza lansamentu primeira pedra ba projetu instalasaun transformadór foun iha Munisípiu Liquiça.
Projetu instalasaun transformadór ne’e ho kapasiade másimu 20 Megavolt Ampere iha sub-estasaun Liquiça.
“Lansamentu ba transformadór foun ne’e atu aumenta tan enerjia tanba Portu Tibar ne’ebé presiza enerjia makas, depois Pelican Paradisse mós presiza enerjia makas no parte Comoro mós hanesan, ita harii tan ida-ne’e atu ajuda mós estasaun ida iha Camea Dili ne’e tanba iha Dili la kleur tan ita sei iha edifísiu boot barak, entaun presiza enerjia ne’ebé makas tan”, Ministru MOP Samuel Marçal dehan ba jornalista sira iha Liquiça, ohin.
Nia dehan, projetu ne’e ho karater urjente ho objetivu atu bele rezolve problema liña eletrisidade iha kapitál Dili.
“Ida-ne’e ita halo emerjénsia uitoan hodi atende ba problema eletrisidade ne’ebé iha, tinan oin ita sei harii tan sub-estasaun ida iha Comoro hanesan ho ida Liquiça ne’e hanoin bele aumenta liután kapasidade enerjia”, nia dehan.
Iha okaziaun ne’e, SEEAS Santos Noronha husu ba kompaña atu hala’o obra ne’e ho responsabilidade no tuir kontratu ne’ebé iha.
“Husu ba kompaña, ita-boot sira tenke servisu ho kualidade no espesifikasaun ne’ebé EDTL, EP fó tenke halo tuir, ba kontratu iha fulan hira ita-boot sira tenke halo tuir”, Noronha hateten.
Aleinde ne’e, nia alerta mós ba tékniku EDTL, EP hotu liuliu iha parte manutensaun, atu ba oin tenke halo manutensaun ho didi’ak atu buat ne’ebé Governu investe bele utiliza ba tempu naruk.
Projetu ne’e sei konstrui hosi kompaña Xineza TBEA ho durasaun fulan lima ho totál orasamentu hamutuk millaun $3.5.
Jornalista: Hortencio Sanchez
Editór : Zezito Silva
