iklan

POLÍTIKA

MAE la autoriza kargu titulár PAM no Administradór sira asina dokumentu

MAE la autoriza kargu titulár PAM no Administradór sira asina dokumentu

Ministru Administrasaun Estatál, Tomás do Rosário Cabral. Imajen Tatoli/Francisco Sony

DILI, 06 dezembru 2023 (TATOLI)—Governu liuhosi Ministru Administrasaun Estatál (MAE) hasai karta sirkulár ida ba Prezidente Autoridade no administradór munisipál sira atu konvoka sorumutu imediata ho diretór servisu munisipál sira hotu hodi sensibiliza konteúdu hosi sirkulár atu kumpre.

Karta sirkulár ne’e nia konteúdu haktuir, iha fulan-novembru nia klaran ne’e MAE la autoriza autoridade munisipál sira atu asina dokumentu hodi hein Governu nomea fali ema foun atu troka sira-nia fatin.

“Hahú loron 23 novembru 2023, titulár kargu sira hanesann Prezidente Autoridade munisipál sira, Sekretáriu munisipál sira, Diretór Servisu munisipál sira no Administradór Postu sira, la autoriza atu asina kualker dokumentu ou halo aktu administrativu to’o nia substitutu legál ka titular kargu refere hetan nomeasaun,” refere karta sirkulár hosi MAE ne’ebé Agência Tatoli asesu, kuarta ne’e.

Karta sirkulár ne’e hato’o ba autoridade hotu iha nível munisipál, postu administrativu no suku katak iha loron 23 novembru 2023, Prezidente Repúblika promulga ona Dekretu-Lei Nú. 84/2023, alterasaun dalimak kona-ba Estatuto das Administrações Municipais, das Autoridades Municipais e do Grupo Técnico Interministerial para a Descentralização Administrativa, ikus liu ho Nú. 94/2022, 28 dezembru.

Bazeia ba artigu 6, pontu 2 hatuur katak hapara hotu nomeasaun no komisaun servisu hosi Prezidente Autoridade munisipal sira, Sekretáriu munisipál sira, Diretór Servisu munisipál sira no Administradór Postu sira no transitoriamente mantein sira-nia funsaun to’o iha rekondusan ka substituisaun.

Ministru Administrasaun Estatál (MAE), Tomás Cabral, hateten karta sirkular ne’ebé MAE hasai ne’e la’ós orden maibé ida-ne’e mandatu mak remata.

“Hasai karta sirkular ne’e tanba autoridade munisipál sira-ne’e sira-nia mandatu mak ramata,” Tomas Cabral hateten ba Agência Tatoli, hafoin reuniaun Konsellu Minsitru (KM) iha Palásiu Governu, kuarta ne’e.

Jornalista : Osória Marques

Editór        : Cancio Ximenes

iklan
iklan

Leave a Reply

iklan
error: Content is protected !!