VIQUEQUE, 06 dezembru 2023 (TATOLI)—Sarani katólika hosi postu Viqueque Vila, munisípiu Viqueque, kuarta ne’e, simu Bispu Dioseze Baucau, Dom Leandro Maria Alves, ho kontente no entusiazmu.
Dom Leandro Maria Alves ordanedu no nomeadu nu’udar Bispu Dioseze Baucau hosi Bispu Dioseze Dili, Dom Virgílio Cardeal do Carmo da Silva, iha loron 21 jullu 2023.
“Prezensa Amu Bispu ida-ne’e, ami sarani hotu-hotu sente kontente no entusiazmu hodi simu Bispu, ho kultura munisípiu Viqueque. Ami iha esperansa ba Amu Bispu foun ida-ne’e bele tau-matan ba ninia sarani sira,” Veteranu Viqueque, Jacinto Seramalic, hateten, hafoin simu Amu Bispu, iha Igreja Maria Imaculda Tilou.
Iha fatin hanesan, Sarani hosi suku Luca, António Viana Pinto, konsidera prezensa Amu Bispu lori dame no ksolok ba sarani atu kria pás no estabilidade.
“Nune’e, sarani sira bele moris ho livre hosi tentasaun oin-oin,” nia akresenta.
Notísia relevante : Pe. Leandro Maria Alves nomeadu sai Bispu foun Dioseze Baucau
Prezidente komisaun organizadora, Carlos Pinto, hateten, objetivu hosi vizita Amu Bispu Dioseze Baucau iha Viqueque atu fó ordenasaun saserdotál ba bibi-atan na’in-rua no frater na’in-haat.
“Tanba ne’e, ami halo preparasaun hodi simu Amu Bispu ninia vizita dahuluk mai munisípiu Viqueque. Aban Amu Bispu sei kontinua fó krismadu ba sarani hamutuk 1.000 iha Uetali postu Viqueque Vila,” Carlos informa.
Biban ne’e, nia husu sarani Parokia Viqueque tenke partisipa selebrasaun misa ba ordenasaun ba Dialákonu nian ne’ebé realiza Igreja Maria Imaculada Tilou.
Dom Leandro Maria Alves iha Parokia Viqueque durante loron-tolu no sei fila ba Dioseze Baucau iha loron 08 dezembru.
Tuir observasaun Jornalista Agência Tatoli, nota katak Amu Bispu ho ninia komitiva to’o munisípiu Viqueque iha tuku 15:00 no sarani katólika hosi suku 10 ne’ebé eziste iha postu Viqueque Vila simu ho tradisaun kulturál Viqueque, akompaña ho dansa kulturál ne’ebé simu iha jardín 1959 la’o to’o Igreja Maria Imaculda Tilou.
Hafoin to’o igreja, Lia-na’in no sarani sira kontinua lori Amu Bispu bá fatin kulturál hodi lok malus no bua tuir kultura Viqueque.
Vizita Bispu Dioseze Baucau ne’e simu hosi Amu Pároku Viqueque Vila, Autoridade komunitária, sarani postu Viqueque Vila no akompaña hosi Polísia Nasionál Timor-Leste.
Jornalista : Vitorino Lopes da Costa
Editora : Julia Chatarina
