iklan

DEFEZA, HEADLINE

Membru F-FDTL 175 halo juramentu hases aan hosi GAM no GAR

Membru F-FDTL 175 halo juramentu hases aan hosi GAM no GAR

Primeiru Ministru Xanana Gusmao enkoraza komandante PNTL husi municipio sira bainhira partisipa iha juramentu membru FDTL no PNTL neebe emvolve iha arte masial no arte ritual iha Palacio governu, kinta 7 desembru 2023. Foto Tatoli/Antonio Daciparu

DILI, 07 dezembru 2023 (TATOLI) – Membru F-FDTL 175 hosi Unidade Sentru Instrusaun Komandante Nicolau Lobato no Unidade Apoiu Servisu (AUS) halo juramentu ba bandeira nasionál hodi deklara katak la envolve aan ona hosi Grupu Arte Marsial (GAM) no Grupu Arte Ritual ( GAR).

Membru F-FDTL hirak ne’ebé hola parte iha serimónia juramentu ne’e kompostu hosi mane 172 no feto nain tolu.

Membru F-FDTL 175 ne’e mai hosi organizasaun arte marsiál Persaudaraan Setia Hati Terate (PSHT), Ikatan Kera Sakti (IKS) no KORK inklui arte rituál 77, Kolimau 2000.

Juramentu ne’e halo ho serimónia parada ne’ebé hala’o iha kampu parada Sentru Instrusaun Nicolau Lobato Metinaro kuarta (7/12) ne’e no prezide hosi Xefe Departementu Justisa Kuartel F-FDTL Major Jeneral Américo Ximenes ‘Sabika Besi-Kulit’.

Membru F-FDTL ne’e jura katak halo funsaun hanesan membru F-FDTL hodi servisu de’it institusaun F-FDTL, nasaun no povu no sei la servi ba kualker organizasaun.

“Ha’u jura ho hau nia onra katak ha’u sei halo ha’u nia funsaun hodi servi instituisaun F-FDTL tuir lei haruka, servi ba nasaun no povu no loyál ba irakia superiór no sei la envolve aan iha kualker organizasaun arte amarsiál no arte rituál”, hateten iha akta ne’ebé le sai hosi Komandante Sentru Instrusaun Komandante Nicolau Lobato Metinaro Tenente Koronél, Eúgenio Guterres ‘Tofa’ bainhira prezide serimónia juramentu ba membru F-FDTL175 ne’ebé hala’o iha kampu parada Sentru Instrusaun Komandante Nicolau Lobato Metinaro, kuarta ne’e.

Hafoin juramentu, membru sira asina akta no entrega kedan atributu arte marsiál no rituál hodi simboliza katak membru F-FDTL175 hases aan hosi GAM no GAR  no asiste direta hosi Majór Jeneral Sabika Besi-Kulit akompaña hosi Komandante Sentru Instrusaun Komandante Nicolau Lobato Metinaro Komandante Tofa, reprezenta KRAM, reprezentante organizasaun arte marsiál PSHT, IKS, KORK inklui arte rituál Kolimau 2000 no 77.

Iha intervensaun, Xefe Departamentu Jusitisa F-FDTL, Maijór Jeneral Americo Ximenes ‘Sabika Besi Kulit’ hateten serimómia juramentu ba mrmbru F-FDTL, Governu dasia nia inisiativa, tanba durante ne’e Governu nota katak iha forsa no membru seguransa balun deskonfia envolve iha grupu GAM no GAR hodi kria konflitu iha komunidade nia le’et.

Nia dehan, juramentu ida-ne’e la’os dala ida-ne’e deit, maibé ba dala tolu ona, maibé iha kazu balun dekonfia militár no seguransa balun kontinua envolve iha grupu artemarsiál.

“Kuandu imi jura ona mak imi envolve nafatin iha arte marsiál mak komandu sei la tolera no sei foti desizaun ho rigór hodi bele hasai hosi F-FDTL”,nia adianta.

Iha fatin hanesan, reprezentante kordenadór arte marsiál PSHT Alfredo Soares Fernades, hateten, hanesan kordenadór PSHT haree katak buat ne’ebé mak membru F-FDTL halo ne’e di’ak tanba ne’e hatudu organizasaun la boot liu Estadu. Tanba ne’e jura katak tenke kumpre hodi servi ba nasaun no povu.

“Sira ohin entrega fali atributu atu sira haree ba nasaun nian interese, sira atu defende nasaun dúke organizasaun. Nia para hosi hosi organizasaun ne’e laiha impaktu ida tanba ne’e pretense ba sentimentu nasionálidade, patriotizmu atu defende rai no povu ida-ne’e”, nia dehan.

Kordenadór IKS Metinaro, Endenso Fernades, hateten, Unidade Sentru Instrusaun Komandante Nicolau Lobato Metinar onia prezensa atu asiste membru sira halo juramentu hodi hases aan hosi organizasaun IKS no entrega atributu sira, hanesan sidadaun no ema militár tenke kumpre regulamentu ne’ebé mak militár iha atu servi de’it no povu no nasaun.

Nune’e mós, Kordenadór KORK, Postu Administrativu Metinaro Agostu Maria Madeira, hateten, hanesan kordenadór KORK nia respeita desizaun Governu nian ne’ebé halo juramentu ba membru arte marsiál iha institusaun militár ho ida-ne’e militár tenke servi ho onestidade ba instituisaun, nasaun no povu.

“Ha’u respeita tebes desizaun Governu nian, kuandu haruka membru grupu arte marsiál ida jura hodi sai hosi grupu arte marsiál hotu hotu no entrega atributu atu nune’e sira bele servi de’it povu ida-ne’e, ne’e ha’u apoiu”, nia realsa.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!