iklan

DEFEZA, HEADLINE

Xanana husu membru F-FDTL no PNTL hatudu onestidade hodi servi povu no nasaun

Xanana husu membru F-FDTL no PNTL hatudu onestidade hodi servi povu no nasaun

Primeiru Ministru Xanana Gusmao koalia ho membru PNTL ida hafoin partisipa iha juramentu ba membru PNTL no FDTL neebe involve iha arte marsial no arte ritual iha Palacio governu, kinta 7 desembru 2023. Foto Tatoli/Antonio Daciparu

DILI, 07 dezembru 2023 (TATOLI) – Primeiru-Ministru, Xanana Gusmão, husu ba membru Polísia Nasionál Timor-Leste no FALINTIL-Forsa Defeza Timor-Leste atu hatudu onestidade ba institusaun hodi servi povu no nasaun Timor-Leste.

“Ha’u hanesan Primeiru-Minsitru apela ba membru hosi instituisaun F-FDTL no PNTL atu hatudu imi-nia onestidade hodi servi instiusaun ida hanesan F-FDTL no PNTL tanba instiusaun rua ne’e importante tebes ba rai ida-ne’e no povu  ida-ne’e”, Xanana Gusmão hateten iha nia intervensaun bainhira prezide serimónia juramentu ba membru F-FDTL no PNTL sira hodi jura ba bandeira nasionál hodi hases aan hosi atividade arte marsiál no rituál ne’ebé halao iha Palásiu Governu, kuarta ne’e.

Tuir Xanana katak instituisaun F-FDTL no PNTL nu’udar institusaun ne’ebé importante ba nasaun no povu, misaun mak atu garante estabilidade, maibé kuandu mete fali arte marsiál ne’e hanesan Primeiru-Ministru la admite ida-ne’e.

Tanba ne’e, Governu realiza juramamentu ba membru F-FDTL no PNTL ne’ebé envolve iha Grupu Arte Marsiál (GAM) no Grupu Rituál atu sira bele hases aan hosi atividade arte marsiál sira hodi servi de’it no nasaun ida-ne’e.

“Ita bo’ot sira nia responsablidade mak ba estabilidade povu no rai ida-ne’e, labele envolve aan iha Grupu Arte Marsiál ka Rituál, enkuantu ha’u sei Primeiru-Ministru ha’u la admite ida-ne’e tanba ne’e ohin ita bo’ot mai iha ne’e atu jura katak hadook aan hosi atividade sira nune’e servi de’it povu no rai ida-ne’e”, nia dehan.

“Juramentu la’os ida ne’ebé mak atu bele halakon buat sira ne’e, maibé importante mak imi nia asaun imi-nia konsiénsia hodi servi povu ho rai ida-ne’e ho laran oinsa imi servi povu ida-ne’e  no servisu imi-nia institusaun ho onestidade iho profisional ida-ne’e mak importante”, nia adianta.

Xanana observa durante ne’e katak komunidade timorense lakon ona kultura tulun malu, moris hanesan família tulun malu hanesan maun no alin iha sosiadade, moris iha tempu ohin loron haree liu ba kór arte marsiál hodi haketak relasaun amizade entre ema ho ema seluk.

Nia hatutan, situasaun hanesan akontese iha institusaun F-FDTL no PNTL tanba problema ruma kuandu polísia ba atua komunidade kestiona sira nia problema mak defende fali ba kor tanba ne’e lakon ona fiar hosi komunidade.

Tanba ne’e, Xanana husu ba F-FDTL no PNTL tenke evita envolve aan iha atividade arte marsiál hodi servi povu no nasaun .

“Ha’u bolu imi mai iha ne’e hodi jura no hateten ba públiku katak atu ajuda ha’u hodi servi de’it ba povu no nasaun ida-ne’e”, Xefe Governu ne’e salienta.

Xanana prezide juramentu membru F-FDTL no PNTL ne’ebé envolve GAM no GAR

Iha kuarta (7/12) loraik tuku 15:00 ne’e, iha Palásiu Governu liuhosi serimónia parada, Xefe Governu Xanana Gusmão prezide juramentu ba membru F-FDTL no PNTL ne’ebé mak envolve aan iha Grupu Arte Marsiál no Rituál atu hases aan hosi arte marsiál no rituál sira hodi servi de’it povu no nasaun.

Membru F-FDTL ne’ebé mak halo juramentu ba bandeira nasionál kompromete hases aan hosi atividade GAM no GAR ne’e hamutuk ema nain-500 kompostu hosi Kuartel Jenerál, Unidade FALITIL, Unidade Polísia Militár, Unidade Sentru Instrusaun Komandante Nicolau Lobato Metinaro, Unidade, Apoa Servisu (UAS), Komponente Terrestre, Komponente Navál no Aero.

Serimónia juramantu ne’e membru F-FDTL no PNTL entrega mós atributu arte marsiál no rituál ba Primeiru-Ministru Xanana Gusmão katak membru F-FDTL no PNTL ne’e simbolikamente  sees ona hosi atividade arte marsiál no arte rituál.

Iha fatin hanesan, Xefe Estadu Maiór Jenerál F-FDTL, Tenente Jenerál Domigos Raul Falur Rate Laek, hateten juramentu ba membru F-FDTL Komandu F-FDTL deside halao iha unidade idak idak no komponente idak idak.

Nia dehan, membru F-FDTL hotu tenke deklara aan hodi servi de’it ba povu no nasaun, labele servi fali organizasaun arte marsiál, kuandu membru sira mak bosok lakohi deklara aan no lakohi entrega sira-nia farda mak instituisaun hetan Komandu sei halo prosesu disiplinár no sei hasai membru.

Falur fiar katak membru F-FDTL la subar buat ida tanba durante ne’e hatudu duni loyalidade hodi servi povu no nasaun.

“Timor ne’e ran, ne’e ran asuwain, ita falta konsiénsia de’it, ha’u fiar sira tama kle’ur, barak simu ona edukasaun formál hosi instuisaun ne’ebé durante sira servi ba, ha’u, sira sei servi instituisaun ne’e ho loyalidade”, nia dehan.

Komandante Jerál PNTL, Komisáriu Jerál Polísia Henrique da Costa, dehan juramanru ba membru PNTL no F-FDTL ne’e pedidu ne’e mai hosi Primeiru-Ministru Xanana Gusmao ho objetivu atu halo kompromisu hodi proteje rai no povu ida-ne’e, servi instituisaun no servi povu ho profisionál.

Nia dehan, membru PNTL ne’ebé mak tuir juramantu ba bandeira hodi hasees aan hosi atividade grupu arte marsiál no rituál hamutuk 267.

“Ohin sira promete ona katak hahú ohin no ba oin sira sei la tuir tán atividade ka treinu arte marsiál arte rituál sira ne’ebé ita identifika”, nia informa.

Nia dehan, kuandu iha membru PNTL mak sei subar aan hodi lakohi deklara aan mak Komandu hetan nia konsekuénsia mak sei hasai nian.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!