DILI, 08 dezembru 2023 (TATOLI) – Arsebispu Arkedioseze Metropolitana Dili, Don Virgílio Kardeál do Carmo da Silva, sesta ne’e, fó ordenasaun presbiterál ba Diákonu na’in-rua atu sai amu-lulik hodi sai bibi atan ba sarani katólika.
Diákonu na’in-rua ne’ebé simu ordenasaun mak hanesan Tadeu Osório dos Reis da Silva no Diákonu Victór de Jesus iha fidelidade ba nia vokasaun tuir ezemplu Nosa señora fó nia sim ba Maromak.
“Imi na’in rua nia sim ba Maromak provoka atu ami no sarani sira bele renova ami nia sim dala ida tan ba Maromak. Ohin atu hatudu tan ami nia fidelidade ba Maromak. Importante mak loron fó sim ba Maromak”, Don Virgílio Cardeál hato’o mensajen ne’e iha misa Ordensaun Diákonu no ordenasaun tinan 25 Don Vírgilio Kardeál do Carmo da Silva nakait loron Nosa Señora Imakulada Conceição, iha Igreja Katedrál-Dili.
Arsebipu ne’e reforsa sim Maromak ezije atu entrega aan tomak ba Maromak no xamamentu hodi sai bibi atan ne’ebé di’ak ba nia sarani sira.
“Imi na’in rua sai joven nafatin, maibé joven ida la’ós livre, joven ne’ebé fó aan tomak ba Maromak. La’os sorin ba Maromak, sorin ba ema seluk. Husik buat hotu hanoin de’it ba Maromak. Ida ne’e mak sim Maria nian saran aan tomak”, Don Virgílio fó hanoin.
SIM Maria nian sai destinu ba umanidade tanba husi kolaborasaun Nosa Señora lori salvasaun ba mundu tomak.
“Sim ba Maromak prosesu no asaun Espíritu Santu ne’ebé sai protagonista ba sim no ita nia entrega ba Maromak no susesu ema nian. Dala barak ita hanoin buat hotu ita ema nia esforsu de’it”, katak nia.
Iha fatin hanesan, Saserdote Odernadu, Tadeu da Silva husi munisipiu Ermera reprezenta aan ho nia kolega Victór de Jesus husi munisipiu Aileu agradese ba sarani, familia no formadór sira Padre, madre, Bispu no Kardeál ne’ebé prezide selebrasaun misa ba sira na’in rua nia ordenadasaun.
“Obrigada ba ema hotu ne’ebé akompaña ami perkursu moris nia no grasa husi na’in Maromak nia laran luak to’o mai ohin loron fó oportunidade ida ne’e”, Sasardote ne’e agradese.
Na’in Maromak la bolu ema ne’ebé Santu, maibé ema nia mak hasantu, nune’e nia bolu ona ami no hili ami.
“Ami hato’o ami nia profundu agradesimentu ba Na’in Maromak ba grasa ordenasaun loron espesial ida ne’e no sai momentu markante ba ami hodi hakerek ami nia istoria vida iha pajina foun hanesan estadu vida ida Cristo sai ami nia”, katak.
Saserdote ne’e hateten sira na’in-rua iha misaun ida sai “como servos no bom pastor das ovelhas e das almas”.
Lansa Biblia versaun tetun-Kondekora Katekista
Iha misa solenidade, Nosa Señora Imaculada Conceição, Kardeál metropolitana Dili, Don Vírgílio do Carmo da Silva lansa mós Biblia iha versaun tetun no kondekora katekista ema 30 diosese Dili nian ne’ebe servisu liu tinan 30 serbí iha uma kreda.
Biban ne’e, Katekista sentru pastorál Alas Same, Raimundo da Costa, sente orgullu tanba bele hetan kondekorasaun husi Kardeál Metropolitana Dili, Dom Vírgílio do Carmo da Silva nu’udar rekoñesimentu ida ba nia misaun.
“Ha’u hahú misaun husi tinan 1998. Ha’u kontente simu kondekorasaun, ida ne’e motiva ha’u atu serbí di’ak liu”, nia afirma.
Jornalista: Jesuína Xavier
Editór : Florencio Miranda Ximenes
