DILI, 08 dezembru 2023 (TATOLI) – Arbispu Arkidioseze Metropolitana Dili, Don Virgílio Kardeál do Carmo da Silva, la konkorda ho polítika no planu hosi Institutu Nasionál HIV/SIDA (INCSIDA,I.P) ne’ebé hahú introdús ba públiku atu buka konsensu hodi halo legalizasaun ba lokalizasun seksu komersiál iha Timor-Leste tanba kontra Maromak nia ukun fuan.
“Nu’udar sarani ne’e kontra tebe-tebes igreja nia ukun fuan no igreja nia doutrina, bainhira atu legaliza fatin prostituisaun iha Timor-Leste”, hateten Don Virgílio Kardeál, iha Igreja Katedrál Dili.
Notísia relevante: INCSIDA introdús konsensu fatin ba prostituisaun
Tanba, Don Virgílio Kardeál ne’e epslika Timor-Leste iha nia sarani ho númeru maiór ho katólika, tanba ne’e mak tenke tetu didiak, molok atu legaliza.
“Kuandu ita rona, ita nia rai atu legaliza fatin prostituisaun ho rai ida ne’ebé pursentu 96.5 katólika, ita atu ba loos ne’ebé? Buat ida ne’ebé ita husu Na’in Feto iha nia loron ida ne’e atu tulun ita hotu, ita hotu tenki hanoin didiak, hanoin kle’an ba desizaun ne’ebé ita hakarak halo, atu labele hanoin de’it ba ita nia aan, maibé hanoin ba futuru rai ida ne’e ninian. Bainhira ita legaliza prostituisaun ida ne’e ita imajina atu ba loos ne’ebé? tanba ita nia identidade katólika tau loos iha ne’ebé, oinsa ita ko’alia ba mundu katak maioria ema Timor ne’e katólika”, lamenta Don Virgílio Kardeál.
Nune’e, Líder igreja Katólika iha Timor-Leste ne’e husu ba sidadaun hotu-hotu atu hatene nia identidade katólika no kulturál ne’ebé iha valór atu labele foti desizaun, molok legaliza.
“Ita presiza hatene identidade no kultura Timor ninian, valór familia bo’ot loos ne’ebé haforsa ita nia fiar sarani, será que loke no legaliza fatin prostituisaun ne’e atu redúz númeru HIV/SIDA iha Timor-Leste?. Fatin ne’e legaliza tanba de’it númeru refere bo’ot? Ita tenki hanoin no, antes legaliza. Ita tenki halo estudu ida di’ak”, Don Virgílio fó hanoin.
Notísia relevante: Líder relijiozu sira la konkorda legaliza lokalizasaun servisu seksu komersiál iha TL
Antes ne’e, Líder relijiozu sira ne’ebé eziste iha Timor-Leste, mós la konkorda ho polítika no planu hosi Institutu Nasionál HIV/SIDA (INCSIDA,I.P) ne’ebé hahú introdús ba públiku atu buka konsensu hodi halo legalizasaun ba lokalizasun seksu komersiál iha Timor-Leste.
Lideransa relijiaun sira ne’ebé la konkorda mak hosi Igreja Protestante, Kon Fu Tzu no Islámiku tanba konsidera fó impkatu ba sidadaun Timor-Leste nia morál, espirituál no kulturál.
Daudaun ne’e INCSIDA,I.P, hala’o hela konsultasaun ho komunidade sira, inklui mós lider relijiozu sira iha TL no mós sosiedade sivíl, ho objetivu atu rona sira-nia ideia konstrutivu sira molok harii sentru prostituisaun ida atu prevene kazu pozitivu sira kona-ba HIV/SIDA iha Timor-Leste.
Estabelesimentu fatin prostituisaun ne’e importante tebes atu bele kontrola atividade seksuál livre iha TL. Ho lokalizasaun ba prostituisaun, INCSIDA sei kolabora ho Ministériu Saúde, Ministériu Administrasaun Estatal, Polísia Nasionál Timor-Leste (PNTL), Governu atu kontrola ninia atividade sira, hodi hamenus númeru kazu pozitivu sira kona-ba HIV/SIDA.
Iha faze konsulta ida-ne’e bele hetan hanoin pozitivu husi komunidade tomak kona-ba estabelesimentu prostituisaun lokalizadu iha futuru atu bele prevene no hamenus kazu pozitivu sira kona-ba HIV/SIDA iha TL.
Aleinde ne’e, INCSIDA mós sei kolabora ho Ministériu Saúde no Ministériu Administrasaun Estatál hodi regula atividade hothotu, otél sira inklui uma aluga atu prevene relasaun seksuál kazál tanba bazeia ba monitorizasaun katak aluga uma no mós otél sira kontribui ba kazu pozitivu HIV/SIDA.
Notísia relevante : Infografia: Timor-Leste rejista pasiente HIV/SIDA 1.704 no mate 271
Jornalista: Jesuina Xavier
Editór : Florencio Miranda Ximenes
