HNGV kompra rasik ai-moruk tanba menus hosi INFPM
DILI, 11 dezembru 2023 (TATOLI) — Institutu Nasionál Farmasia Produtu Medikamentu (INFPM) menus ona ai-moruk, tanba ne’e, husu ba dirijente Ospitál Nasionál Guidu Valadares (NHGV-sigla portugés) atu uza osan hodi halo akizisaun ba ai-moruk iha klínika privada.
“HNGV iha osan atu kompra ai-moruk ho emerjénsia karik, halo de’it justifikasaun ka despaixu husi ospitál mai ha’u hodi haree ai-moruk item sira, banhira item ida laiha, entaun ha’u hasai karta, ami halo justifikasaun ida-ne’e hanesan baze legál ida hodi entrega ba HNGV atu kaer hodi kompra ai-moruk emerjénsia, ida-ne’e baibain halo hela, ne’ebé pedidu husi HNGV nian mai ami responde ona”, Diretor Ezekutivu INFPM Brigido Dias, informa iha nia kna’ar fatin Kampu Alor, ohin.
Brigido husu ba responsável HNGV atu halo akizisaun ai-moruk ho urjénsia ho objetivu atu fó tratamentu ba pasiente sira.
Iha sorin seluk, Diretór interinu Servisu Apoiu Diagnóstiku Terapeútiku iha HNGV, Marcelino Correia, hatan katak HNGV iha osan atu kompra ai-moruk ho emerjénsia no mós konsumavél sira.
Notísia relevante : http://HNGV tau osan rihun $200 atu sosa aimoruk emerjénsia
“Karta ne’e ami haruka tiha ona ba INFPM, depois INFPM halo notifikasaun mai ita katak lista ai-moruk ne’ebé mak fó mai ne’e mak estoke out duni, entaun ita bele kompra emerjénsia, ba ai-moruk sira ne’ebé mak iha klínika privadu sira atu nune’e ita fó tratamentu ba pasiente sira”, nia konklui.
Tuir dadus, estoke ai-moruk no konsumavél hamutuk 120 item ka 20% mak mamuk iha HNGV, ai-moruk hirak ne’e laiha mak afeta tebes ba pasiente nia saúde.
Bazea ba lista ai-moruk mamuk hosi INFPM hatudu katak estoke ai-moruk no konsumavél sira iha armajen nasionál ne’ebé mamuk hamutuk 34%.
Kategoria produtu ne’ebé durante ne’e uza iha fasilidade saúde sira hanesan ai-moruk no konsumavél sira ho totál 1.344, husi ne’e 890 ka 66% mak estoke disponivel no estoke ne’ebé mak mamuk hamutuk 454 ka 34%.
Jornalista : Felicidade Ximenes
Editór : Zezito Silva
