iklan

NASIONÁL, DILI, HEADLINE, SOSIEDADE SIVĺL

JSMP fó formasaun ba profisionál liña frente kona-bá prevensaun tráfiku umanu iha fronteira

JSMP fó formasaun ba profisionál liña frente kona-bá prevensaun tráfiku umanu iha fronteira

DILI, 11 novembru 2023 (TATOLI) – Programa Monitorizasaun Sistema Judisál (JSMP, sigla Inglés) fó formasaun ba  profisionál liña frente iha fronteira Mota Masin kona-bá tráfiku umanu no violénsia bazeia ba jéneru.

JSMP fasilita treinamentu ho matéria tráfiku umanu, prevensaun no responde ba kazu tráfiku umanu no violénsia bazeia ba jéneru ba pesoál sira hamutuk ema na’in 21 hosi instituisaun sira liña frente hanesan Polisia Migrasaun na’in-rua, Unidade Patrollamentu Fronteira (UPF) na’in-ida, Kuarentina na’in-rua, Alfándega na’in-rua, Postu Saúde no Uma Mahon Salele na’in-rua no mobilizador sira suku nian na’in-11.

Programa formasaun ne’e ho títulu “Prevensaun no Resposta ba Tráfiku Umanu ho Baze iha Komunidade, Responsivu ba Jéneru no Sentradu ba Sobrevivente (2023-2024)” finansia husi Ministériu Interior no Implementa husi UN Women Timor-Leste. Formasaun ne’e hala’o ona ba dala haat no ema atus ida resin mak partisipa ona.

“Husu mós ba partisipante sira atu fó atensaun no ativu iha diskusaun, nune’e bele aprende buat ruma no iha koñesimentu hodi identifika krime tráfiku umanu no bele halo prevensaun no apoia vítima sira”, Funsionáriu Seniór ba Advokasia JSPM, José Moniz refere liuhosi nota imprensa.

Treinamentu ida ne’e nu’udar treinamentu kontinuasaun hosi treinamentu sira anteriór sira ho objetivu atu hasa’e koñesimentu liña frente no mobilizadór sira nian kona-ba igualdade jéneru no violénsia bazeia ba jéneru atu identifika kazu tráfiku umanu, nune’e bele halo prevensaun no ajuda lezada sira bainhira iha kazu tráfiku umanu.

Partisipante sira antuziasmu hodi rona matéria sira no ativu inklui hato’o sira nia preokupasaun sira relasiona ho fahe serbisu entre feen ho la’en iha uma laran, aprezentasaun denúnsia ba krime públiku, protesaun ba testemuña no oinsa prova krime violasaun seksuál.

Jornalista: Jesuína Xavier

Editór          : Florencio Miranda Ximenes

iklan
iklan

Leave a Reply

iklan
error: Content is protected !!