BOBONARO, 11 dezembru 2023 (TATOLI) – Diretór Nasionál Apoia Administrasaun Suku hosi Ministériu Administrasaun Estatál, Celestino Marques, informa, kontratu ba Pesoál Apoia Administrasaun Suku (PAAS, sigla portugués) hamutuk 452 sei termina iha loron 31 fulan-dezembru tinan 2023.
“Tinan oin PAAS laiha ona, sira-nia kontratu sei termina iha dia 31 dezembru tinan ne’e, karta mai ona Prezidente Autoridade sira, ne’e tanba administrasaun mudansa, ne’e evolusaun tempu la’ós ita hapara,” nia informa asuntu ne’e durante hala’o atividade formasaun ba xefe suku 50 iha munisípiu Bobonaro, segunda ne’e.
Nia dehan, ministériu deside la halo tan estensaun kontratu ba PAAS hirak-ne’e ho razaun IX governu tinan 2024 sei halo fali rekrutamentu ba ema na’in-haat hanesan sekretariadu administrasaun suku, ofisiál ba asuntu finansa, administrasaun no ofisiál ba asuntu sosiál hodi apoia servisu iha suku.
Nia subliña, IX Governu kria polítika ne’e atu halo simplifikasaun no moderniza sistema administrativa iha suku.
“Ita halo reforma ba suku, harii estrutura, ita rekruta tanba ezijénsia ba oin ne’e, data tenke klaru, ema hotu-hotu bele asesu, ita-nia oan sira presiza, labele halai tun-sa’e, loke de’it portál ministériu nian buat hotu iha-ne’ebá, dadus eletróniku 18 livru ne’e ita hatama hotu iha ne’ebá,” nia katak.
Nia dehan, liuhosi polítika reforma suku ne’e ba oin líder komunitária hanesan xefe suku no xefe aldeia laiha kompeténsia atu kaer osan.
“Sekretáriu ho ofisiál na’in-tolu mak responsabiliza, xefe suku hein kontrola, verifika no asina ba selu osan de’it,” nia hateten.
Nia fó-sai katak, atu aktualiza dadus suku ho loloos bazea ba orientasaun hosi Ministru Administrasaun Estatál Tomás Cabrál.
“Ita sei halo monografia no demografia, atu instala iha suku hotu-hotu, livru 18 ita tau iha kuadru ne’ebá, atu ema ruma bele hare liu ona, labele loke fali livru tún sa’e, totál populasaun hira, uma-kain hira, totál popualsaun hira, sarjana hira, ita-nia rikusoin hira, tau haruka ema haree,” nia katak.
Notísia relevante: MAE kapasita PAAS 50 iha Bobonaro utiliza programa SIIGDSA
Jornalista: Sérgio da Cruz
Editór: Evaristo Soares Martins
