iklan

NASIONÁL, DILI, HEADLINE, SOSIEDADE SIVĺL

La’o Hamutuk preokupa Governu la prioritiza setór produtivu iha OJE 2024

La’o Hamutuk preokupa Governu la prioritiza setór produtivu iha OJE 2024

Peskizadór ONG Lao Hamutuk, halo Konferénsia Imprensa, iha Bairru-Pité, segunda (11/12). Imajen Tatoli/Egas Cristóvão

DILI, 11 dezembru 2023 (TATOLI)- Organizasaun Naun Govermentál La’o Hamutuk (LH), iha loron 6 fulan ne’e, submete analiza krítiku kona-bá Proposta Orsamentu Jerál Estadu  (OJE) 2024, liuhusi submisaun ba Komisaun C, Parlamentu Nasionál.

Peskizadora La’o Hamutuk, Elizaria Febi Gomes, dehan iha proposta OJE 2024 kontinua la hatudu polítika konkretu oinsá buka dalan alternativa hodi diversifika ekonomia rezilente no sustentável.

Peskizadora La’o Hamutuk, Elizaria Febi Gomes. Imajen Tatoli /Egas Cristóvão

“Iha submisaun ne’e, Ami fornese informasaun no rekomendasaun balu ne’ebé bele ajuda Parlamentu Nasionál atu konfirma no deside intensaun sira ne’ebé Governu propoin ba OJE tinan 2024 iha debate plenária.  Tanba Finansiamentu ba OJE 2024 kuaze mai husi Fundu Petrolíferu ho 84% ne’ebé inklui carryover no RAEOA ne’ebé transfere ona husi Fundu Petrolíferu iha pasadu”, dehan nia liuhosi Konferensia Imprensa iha Bebora-Dili.

Apropriasaun ida ne’e, hatudu kondisaun dependénsia aas tebes ba Fundu Petrolíferu, ne’ebé loloos sai kestaun ba Governu atu hanoin dalan alternativu ida sustentável no realístiku hodi asegura katak jerasaun tuir mai sei la sofre fali ba desizaun agora.

Haree ba projesaun Governu nian iha futuru, levantamentu iha 2028 mak billaun $1,57 liu RSE dala rua ho levatamentu 2023. Ho levatamentu hanesan ne’e Fundu Petrolíferu sei hotu ho lalais liu.  Nune’e husu ba Parlamentu Nasional atu uza sira nia kompetensia rasik hodi husu Governu halo esplikasaun klaru ba ida ne’e”, nia afirma.

Nia re-lembra, dezde istória naruk buka posibilidade – rai no gas iha territóriu Timor-Leste, kampu Bayu-Undan mak deskobre iha 1995 no prodús iha 2004 husi produsaun ne’e fornese ona reseita biliaun $23,9 ba Timor-Leste no billiaun $1.7 husi kampu rua seluk Kitan no Elang Kakatua ne’ebé remata ona iha antes no durante 2015, Bayu-Undan sei remata produsaun iha tinan 2023 nian rohan tanba rezerva hotu ona.

Estadu Timor-Leste foti ona osan tokon $650 no mós tokon $130 iha funan até agora husi FP hodi sosa partisipasaun iha konsorsiu Greater Sunrise, no gasta tiha ona biliaun $1,3 resin ba komponente balun iha Projetu Tasi Mane.

“Ami triste atu haree katak mehi kona-ba setór petrolíferu nafatin hetan esperansa primeiru iha Planu Anuál Investimentu Estratéjiku ne’ebé haree husi intensaun Governu atu aloka tokon $13 ba TMP no tokon $13 ba GS”, lamenta.

Haree ba montante boot rua ne’e, Parlamentu Nasionál presiza hatene ho kle’an kustu totál hira ba projetu rua ne’e no previzaun orsamentál sei mai husi ne’ebé, sei fó benefísiu saida ba povu no nasaun no presiza konsidera risku ambientál.

Imajen/Espesial

Tanba ne’e, LH husu Parlamentu Nasionál di’ak liu atu la permite Governu gasta Timor-Leste nian rekursu estratéjiku sira ba projetu ne’ebé finalmente la klaru ho nian retornu no sukat aspetu no risku hotu-hotu.  Alokasaun ba setór esensiál sira hanesan saúde, edukasaun, bee moos no saneamentu kuaze 17% de’it husi totál OJE 2024.

“Ami hanoin katak setór sosiál sira ne’e merese duni atu sai prioridade másimu ne’ebé Governu tenke tau matan, tanba evidénsia reál balu hatudu ona katak labarik sira ho idade tinan 5 mai kraik kontinua ho kondisaun ra’es-badak ho persentajen 47%, fasilidade apoiu saúde ne’ebé la adekuadu, moris kiak ne’ebé kontinua eziste ho persentajen boot”.

Maske nune’e, LH apresia ba inisiativa husi Governu nian hodi halo kriasaun Unidade de Missão para o Combate ao Stunting no prevee osan ho montante rihun $300, maibé LH haree katak programa ne’e sei fó merenda ba inan isin rua no labarik idade menus tinan 12.

LH hanoin katak, maneira kombate nutrisaun presiza reforsa liután liuhusi programa ne’ebé estratéjiku no longu prazu liu atu promove elevasaun ai-han lokál hodi minimiza ba konsumu doméstika ne’ebé domina ho ai-han importadu.

Setór Edukasaun 10%

Proposta OJE 2024 aloka tokon $196 (10% husi totál OJE) ba edukasaun, ne’ebé menus husi padraun internasionál (mínimu 15%). Nune’e Governu no Parlamentu Nasionál tenke konsiente katak kualidade edukasaun ne’ebé menus tebes sei fó efeitu ba produtividade jerasaun aban bainrua nian.

“Oinsá Timor-Leste bele iha jerasaun ne’ebé kualidade hodi kompete iha merkadu mundiál? Se to’o ohin loron setór edukasaun kontinua la hetan atensaun husi estadu”, katak nia.

Setór Saúde 5,5%

Tokon $108 (5.5%) ba setór saúde ne’ebé importante tebes atu asegura saúde pesoál hanesan rekursu umanu ba país ida ne’e, aumenta tan ho númeru malnutrisaun ne’ebé kontinua aas, moras hada’et oin-oin, mortalidade bebé no inan isin rua ne’ebé nafatin aas liu kompara ho nasaun sira seluk. Oinsá estadu bele responde situasaun ne’e bainhira estadu rasik la prioritiza no valoriza nia povu.

Bee moos no saneamentu 1,3%

Alokasaun ba be moos no saneamentu kontinua ki’ik tokon $25 (1.3%), maske tuir Sensu 2022, uma kain menus 40% mak asesu ba torneira públiku, no uma kain ne’ebé torneira instala iha uma laran 10% de’it.

Uma kain ne’ebé kontinua utiliza ou asesu ba mota, bee matan, lagoa, kolan no irrigasaun hodi utiliza ba nesesidade loron-loron nian hamutuk 9%.

“Ami hanoin katak Rekursu umanu nudár pilár importante ba dezenvolvimentu nasaun nian, hodi garante sustentabilidade estadu no hasai povu husi ki’ak no mukit”.

Setór Agrikultura 2,1%

LH nota iha proposta OJE tinan 2024 kontinua la hatudu polítika konkretu oinsá buka dalan alternativu hodi diversifika iha ekonomia ida ne’ebé reziliente no sustentável. Tanba iha setór agrikultura iha kada tinan kontinua laiha mudansa iha nia alokasaun ho de’it 2.1% husi totál OJE 2024.

Imajen/Espesial

Maske, Tuir sensu agríkola 2019, relata katak Timor-Leste iha poténsia ba variedade ai-han oin-oin, maibé rezultadu produsaun seidauk bele responde demanda doméstika, inklui produtu potensiál sira seluk la dezenvolve ho adekuadu. Nune’e polítika diversifikasaun ekonomia tenke realístiku la’os kontinua sai slogan ba periodu eleitorál de’it.

Maske iha espektasaun oin-oin katak hola parte iha ASEAN sei lori benefísiu ba Timor-Leste, maibé bainhira TL seidauk prepara nia ekonomia no setór importante sira hanesan agrikultura, ASEAN sei lori risku ba Timor-Leste, tanba nasaun seluk bele domina TL nia ekonomia no kontinua dependénsia ba produtu sira husi rai seluk no bele mós sai ameasa ba soberania TL no iha tendénsia boot atu traballadór Timoroan lakon partisipasaun iha empregu ho traballadór sira husi membru ASEAN.

Maske Governu konsidera OJE adere ba ASEAN tokon $4,3 montante ki’ik, ami hanoin katak ASEAN La’ós urjente, Soberania ai-han mak importante.

Kauza Mudansa Klímatiku

Nasaun Timor-Leste vulneravel tebes ba kauza sira iha mudansa klimátika, Nune’e LH hanoin katak estadu tenke sériu mós atu konsidera asuntu klimátika hodi define fila-fali ba funsaun importante husi instituisaun sira.

Tanba realidade OJE la prioritiza protesaun ambientál – ANLA nia meta atu fó lisensa de’it, no ANP nia alokasaun kona-ba lisensiamentu ambientál atu estabelese portál de’it.

Nune’e, LH ejize ba Governu labele husik responsabilidade hodi hein de’it apoia husi rai seluk tanba maioria husi fundu klimátika promove de’it interese exteriór sira nian duke nasaun nia vulneravildade no promove de’it injustisa klimátika.

Tanba ne’e, LH fó hanoin katak instituisaun relevante sira inklui Governu en jerál tenke duni tau atensaun sériu ba asuntu ambientál,” nia afirma.

LH mós fó hanoin katak inisiativa atu halo revizaun no avaliasaun PEDN 2011-2030 sai hanesan oportunidade di’ak atu haree kle’an no kuidadu hodi haktuir ba kondisaun reál ne’ebé povu no nasaun ne’e hasoru.

“Ami sujere Parlamentu Nasionál no povu tenke involve iha prosesu ida ne’e, la’ós kontinua fó sala malu maibé atu ajuda no orienta diresaun nasaun nian ba oin, tanba bainhira desizaun konsidera ema hotu nia lian mak maneira ida justu liu”, nia afirma.

Jornalista: Jesuina Xavier

Editór        :  Florencio Miranda Ximenes

iklan
iklan

Leave a Reply

iklan
error: Content is protected !!