Loron mundiál kontra korrupasaun fó hanoin ema serbí povu ho di’ak

DILI, 11 dezembru 2023 (TATOLI)-Vise xefe bankada CNRT iha Parlamentu Nasionál (PN), Deputadu Patrocínio Fernandes, hateten iha komemorasaun loron mundiál kontra korrupsaun iha 09 dezembru ne’e, nu’udar parte ida atu fó hanoin ema hotu atu serbí povu no nasaun ho di’ak liután.
“Importante mak atu ema ida-idak iha ninia konsiénsia hodi hanoin katak hakna’ar-aan iha instituisaun ninian, sira presiza hasees aan hosi aktu sira hanesan karik iha má-utilizasaun, má-administrasaun liuliu ita bele lori orientasaun ba ema hanoin hanesan aktu korrupsaun ruma karik,” nia hateten ba Agência Tatoli iha uma fukun Parlamentu Nasionál (PN), segunda ne’e. .
Sidadaun hotu-hotu ne’ebé hakna’ar aan iha instituisaun Estadu no mós ba sidadaun ne’ebé la hakna’ar iha instituisaun Estadu, sidadaun hotu-hotu ne’ebé mak hola parte iha prosesu hotu-hotu ba dezenvolvimentu nasionál direta ka indireita ne’ebé iha interrese ba públiku ninian buka evita aan hosi situasaun sira-ne’ebé lori ba iha risku aktu korrupsaun.
Aleinde ne’e, Deputadu hosi bankada Governu ne’e hateten liga ba ajenda ba eleisaun komisáriu Komisaun Anti-Korrupsaun (CAC, siglá portugés) ne’ebé to’o agora seidauk realiza ne’e, ninia prosesu agora hein de’it hosi Governu.
“Prosesu ne’e to’o ona rohan. Hein de’it ona desizaun Governu haruka mai Parlamentu Nasionál prontu ona halo prosesu ne’e ba komisáriu CAC,” nia dehan.
Tanba ne’e, nia dehan, sentidu Estadu ba luta kontra korrupsaun hanoin vontade hosi Estadu tomak, la’ós de’it Parlamentu Nasionál hanesan Komponente ida hosi Estadu ne’e rasik ne’ebé iha esforsu hodi hamosu lejislasaun oioin ho obejtivu atu evita ka prevene korrupsaun iha Timor-Leste.
Vise bankada FRETILIN, Deputadu David Dias Ximenes ‘Mandati’, hateten mensajen iha loron mundiál kontra korrupsaun ne’e liuliu ba Timor-Leste katak rai ne’e hamoris ho ruin no raan hosi ida-ne’e mak tenke hatene hanoin malu.
Demokrasia iha maibé demokrasia ne’e la’ós prezente maibé demokrasia ne’e konkistadu la’ós ema fó de’it maibé povu tenke terus no fakar raan.
“Ne’ebé, labele ko’alia kona-ba demokaásia sein hanoin ema seluk nia terus. Labele lori fali demokrasia atu hanoin hanehan fali ema sira terus-na’in sira, tan hodi sira mak ohin loron ita iha Liberdade. Hodi sira mak ita ohin loron ko’alia kona-ba demokrasia. Hodi demokrásia ne’e ita mós ko’alia ba malu, hanoin malu ba para labele han de’it bikan boboot haluha tiha fali ema seluk,” nia dehan.
Jornalista : Nelson de Sousa
Editór : Cancio Ximenes

