DILI, 11 dezembru 2023 (TATOLI) – Ministériu Edukasaun (ME) fó opsaun rua ba manorin kontratadu sira iha territóriu ne’ebé seidauk elejivel ba rejime espesiál bazeia ba Dekretu-lei númeru 31/2023 kona-ba Estatutu Karreira Dosente.
Opsaun ne’e mak sei hetan kontratu indeterminadu ka fó indemnizasaun ba profesór sira ne’ebé mak la prienxe kritériu ME nian, liuliu seidauk iha diploma baxarelatu ka linsensiatura hodi hetan rejime espesiál.
Diretora Nasionál Rekursu Umanu ME, Anita Tavares de Jesus, esplika katak profesór ne’ebé seidauk elijivel sei kontinua hetan kontratu indeterminadu, maibé sira sei lahetan direitu atu hamriik iha aula laran hodi hanorin alunu sira. Bainhira hakarak kontinua sira-nian profisaun tenke foti kursu hodi hetan diploma baxarelatu ka linsensiatura.
“Sira sei ajuda iha prosesu administrasaun. Karik profesór sira ne’e maka hakarak kontinua eskola depois hetan ona abilitasaun akadémika iha universidade ho diploma baxarelatu ka lisensiatura, sira bele hetan oportunidade hodi submete dokumentu atubele tuir fali teste tuir vaga ne’ebe maka sei atribui husi ME rasik. Iha prosesu sira ne’e maka sira ne’ebé hetan kontratu indeterminadu ho grau D ne’e maka pasa iha teste, ita sei muda sira-nian estatutu ba profesór rejime espesiál ho grau B. Tanba ne’e hatuur ona iha Dekretu-lei númeru 31/2023”, dirijente ne’e informa iha Vila Verde, ohin.
Nia salienta katak ba kontratadu sira ne’ebé la elejivel tanba la prienxe rekizitu sei hetan kontratu indeterminadu ho grau D no ba sira ne’ebé maka hili dalan hodi para husi sira-nian profisaun nu’udar manorin maka ministériu sei fó indemnizasaun. Dosente ne’ebé hanorin tinan tolu ona sei hetan indemnizasaun fulan ida no tinan neen hetan fulan rua nian.
Daudaun ne’e iha ona dadus profesór hamutuk 5.009 maka tama ona iha lista, maibé husi númeru refere manorin na’in-4.089 maka hakat ona ba rejime espesiál, husi númeru ne’e 820 husi Dili mak foin lalais toma ona pose sai permanente. Tanba ne’e, ME liuhusi rekursu umanu halo hela esforsu hodi kontinua loke tan prosesu inskrisaun ba profesór kontratadu iha faze daruak nune’e bele tama iha rejime espesiál.
Tanba tuir dekretu lei númeru 31/2023, profesór kontratadu sira hotu iha territóriu nasionál ne’e iha direitu atu submete sira-nian dokumentu atu tama ba rejime espesiál.
Ministériu Edukasaun kontinua halo prosesu ba manorin hira mak elejivel no hira maka la elejivel ba rejime espesiál, nune’e iha tinan oin bele avansa ona ho prosesu foun bazeia ba planu no politika ne’ebe Ministériu Edukasaun prepara ona ba profesór sira atu loke vaga tuir nesesidade ne’ebé eskola sira presiza.
Notísia relevante: Assanami: Profesór sira tenke sai matadalan no eroi kontinuadór ba jerasaun futura
Jornalista: Tomé Amado
Editora: Maria Auxiliadora
