DILI, 11 dezembru 2023 (TATOLI)–Primeiru-Ministru (PM), Kay Rala Xanana Gusmão tuir planu sei partisipa iha atividade boot rua iha Japaun hanesan simeira Japaun no re-reuniaun bilaterál entre Primeiru-Ministru rai rua.
“Ha’u hasoru Primeiru-Ministru hodi hato’o boas vindas hosi Governu Japaun nian, tanba PM sei ba vizita Japaun iha loron tolu tuir mai. Ha’u esplika ajenda rua, primeiru sobre simeira Japaun nian, no senáriu re-reuniaun bilaterál entre Xefe Governu rua,” Embaixadór Japaun iha Timor-Leste, Kimura Tetsuya, hateten, hafoin hasoru Xefe Governu hodi atualiza ajenda vizita bá Japaun, iha Palásiu Governu, segunda ne’e.
PM Xanana no delegasaun sei aranka ba Japaun iha loron kinta (14/12) no sei fila hikas mai Dili iha kuarta (20/12).
Diplomata esplika, simeira Asosiasaun Nasaun Sudeste Aziátiku (ASEAN, sigla inglés) Japaun atu kria hamutuk futuru ne’ebé bazeia ba parseira sinsera, no sei hamosu xavi prinsipál tolu hanesan pás no estabilidade, interkámbiu pesoál ba kulturál, kapasitasaun ba jerasaun foun Timor-Leste no kriasaun ekonomia no sosiedade futuru.
Notísia relevante : Japaun no PNUD disponibiliza millaun $5,1 ba projetu harii no reabilita infraestrutura komunitária
Enkuantu, ligadu ho reuniaun bilaterál entre Xefe Governu sei fortalese relasaun no kooperasaun bilaterál. Aleinde ne’e Governu Japaun reinteira ninia apoia ba adezaun Timor-Leste sai membru plenu ASEAN.
“Iha ne’e Governu Japaun sei hato’o medida foun kooperasaun inklui reforsa kapasitasaun ba adezaun Timor-Leste ba ASEAN,” Embaixadór akresenta.
Antes ne’e, Primeiru-Ministru Japaun, Fumio Kishida iha enkontru nível altu ASEAN-Japan Summit ba dala-43 iha salaun Plenary Hall, Jakarta Convention Center (JCC), iha loron 06 setembru 2023, konvida direitamente Xefe Estadu no Xefe Governu ASEAN hodi partisipa.
Jornalista : Antónia Gusmão
Editora : Julia Chatarina
