DILI, 12 dezembru 2023 (TATOLI) – Ministériu Edukasaun (ME) anunsia ona rezultadu ezame nasionál ne’ebé hatudu katak iha de’it alunu 4,3% husi totál estudante 55.370 husi ensinu báziku, ensinu sekundáriu jerál, tékniku vokasionál no ensinu rekorrente iha anu letivu ida ne’e mak reprovadu.
Ministra Edukasaun, Dulce de Jesus, informa katak entre alunu 28.696 mak inskritu iha ezame no 344 auzente husi 9.o ensinu báziku, 5,08% mak la pasa. Entre estudante 23.064 (364 auzente) husi ensinu sekundáriu jerál, 5,81% mak reprovadu.
Ensinu tékniku vokasionál iha estudante 4.057 mak rejistu iha ezame (93 falta), 100% aprovadu no entre alunu 401 (57 auzente) husi ensinu rekorrente, 2,03% mak reprovadu.
Dulce de Jesus enkoraja estudante sira ne’ebé maka hetan ona rezultadu di’ak iha ezame nasionál ne’e atu kontinua haka’as aan hodi estuda, tanba rezultadu ne’ebé sira hetan ne’e esforsu ne’ebé halo ona iha pasadu, maibé ida ne’e tenke sai nafatin motivasaun hodi bele hakat bá oin.
Nune’e mós ba alunu 2.767 ne’ebé reprovadu iha ezame, governante ne’e husu labele laran-taridu, maibé buka prepara aan di’ak liután iha futuru atubele sai estudante ida ne’ebé tama iha mell’ór klasifikadu.
“Ha’u husu ba estudante sira ne’ebé maka tinan ida ne’e la hetan rezultadu di’ak, labele laran-taridu, maibé tenke haka’as aan hodi bele hatudu rezultadu di’ak iha 2024. Ohin, ita-boot sira la pasa, la’ós ita-boot sira lahatene, maibé preparasaun maka seidauk másima. Tan ne’e, seidauk hetan oportunidade atu hakat tan bá oin”, hatete iha ámbitu anunsia rezultadu ezame iha Vila Verde.
Husi rezultadu ezame nasionál ne’ebé ministériu fó sai ona ba públiku ne’e, iha mós rezultadu estudante mellór klasifikadu hamutuk na’in-40 husi kada ensinu iha ema na’in-10. Enkuantu ministériu iha tinan ida ne’e seidauk iha politika ida atu motiva estudante sira ho apresiasaun ruma, tanba sei bazeia hela ba programa bolsa méritu ne’ebé seidauk finaliza no ME sei diskute iha tinan oin.
Totál estudante ne’ebé inskritu iha ezame nasionál tinan ne’e hamutuk 56.218, maibé 55.370 mak realiza ezame refere no husi númeru ne’e 52.603 mak aprovadu.
Notísia relevante: PNTL sei fó seguransa ba anúnsiu rezultadu ezame nasionál
MEJD anunsia rezultadu ezame nasionál
Jornalista: Tomé Amado
Editora: Maria Auxiliadora
