Governu apoia orsamentu ba vítima uma mahon haat la sufisiente
DILI, 12 dezembru 2023 (TATOLI)–Diretora Ezekutiva Forum Komunikasaun Feto Timor-Leste (FOKUPERS), Maria Fátima Perreira Guterres, dehan apoiu orsamentu hosi Governu liuhosi Ministériu Solidariedade Sosiál no Inkluzaun (MSSI), la sufisiente hodi atende ba vítima sira iha uma mahon haat iha Dili, Maliana no Suai.
“Tanba ami-nia atendimentu ba vítima kada loron rejistu ema na’in-ida (1) to’o na’in-neen (6) no ita sura to’o fulan ida, ita rejista vítima hamutuk 30 to’o 50. Daudaun ne’e, liu ema na’in-50 tanba ita sura ho inan ne’ebé mai ho oan. Tanba, violénsia doméstika fó impaktu mós ba oan sira, entaun oan tenke hela ho nia inan iha uma mahon,” Diretora FOKUPERS ne’e hateten ba Agência Tatoli, hafoin halo konferénsia imprensa ba mídia briefing kona-ba Orsamentu Jerál Estadu (OJE) 2024 nian iha Palpaso, segunda ne’e.
Tanba, tuir nia, FOKUPERS iha uma mahon haat, Dili iha rua, mak uma mahon adultu ho labarik nian, depois ida iha Maliana no ida seluk iha Suai ne’e ba uma tranzitu katak simu vítima ho tempu determinadu no hela durante semana ida, liu ida-ne’e tenke transfere ona ba uma mahon seluk.
Uma Mahon Maria Tapo, nia dehan, Governu apoiu besik rihun $40 hodi atende ba vítima sira maibé mós ema na’in 10-15 de’it no ba uma Dili ho Suai nian mak Governu aloka rihun $70-$80.
“Osan ida-ne’e la sufisiente hodi atende ba vítima sira, ezemplu kiik de’it bainihira vítima feto hetan menstruasaun fulan-fulan ne’e de’it ita gasta lubuk ida ona. Ida-ne’e mak sai kestaun ida ba ami maibé ami nafatin esforsu hodi hakbesik ba doadór internasionál hanesan DFAT liuhosi programa Nabilan doadór ida tan Misericórdia hosi Alemanha nian, inklui mós hetan apoiu hosi empreza sira hosi parte Europa nian ne’ebé haree liubá asuntu re-integrasaun,” nia dehan.
Tanba orsamentu espesifiku ba re-integrasaun nian ne’e laiha apoiu hosi MSSI nian entaun liuhusi empreza sira-ne’e mak hodi apoiu aihan no pakote nesesidade bázika nian.
Kazu ne’ebé mak rejistu iha FOKUPERS ne’e liu 50 maibé ida-ne’e ba Uma Mahon Dili nian de’it seidauk konta no kuandu tau hamutuk barak liu, tanba ne’e atu dehan orsamentu ne’e labele atende ba vítima sira.
Kazu ne’ebé durante ne’e FOKUPERS atende mak violénsia bazeia ba jéneru maibé espesifiku liu ba violénsia doméstika, violénsia seksuáll, asédiu seksuáll, inklui mós kazu insestu no abuzu seksuáll sira.
Jornalista : Osória Marques
Editór : Cancio Ximenes
