iklan

NASIONÁL, DILI, HEADLINE, INKLUZAUN SOSIÁL, SOSIEDADE SIVĺL

Governu presiza prioritiza setór bee moos no saneamentu iha OJE 2024

Governu presiza prioritiza setór bee moos no saneamentu iha OJE 2024

Inan-feton sira iha Tasi-Tolu dudu hela karosa ho jerigen hodi ba kuru bee-moos hodi bele hakonu nesesidade loronloron nian. Imajen Tatoli/António Gonçalves.

DILI, 12 dezembru 2023 (TATOLI) – Plataforma Nasionál Bee, Saneamentu no Ijiene Timor-Leste (PN-BESI-TL) husu ba Governu no Parlamentu Nasionál atu fó prioridade ba setór bee iha Orsamentu Jerál Estadu (OJE) 2024 ho 3% hodi bele fornese ba populasaun.

“Presiza halo diskusaun kle’an ho Governu konabá proposta OJE 2024 ba setór bee moos no Saneamentu ne’ebe kontinua hatudu porsentu ki’ik kompara ho setór sira seluk. Ami kontinua husu alokasaun mínimu ba Bee no Saneamentu purvolta 3%”, refere nota ne’ebé Agência TATOLI asesu.

Atu garante sustentabilidade fornesimentu Bee moos ba komunidade sira, liu-liu iha área rurál mak presiza iha alokasaun OJE ba munisípiu sira aloka mós orsamentu ba operasaun  no manutensaun nian, inklui aloka mós orsamentu hodi garante ezisténsia grupu maneja fasilidade liuhusi insentivu ruma ba sira.

Alende ne’e bele iha alokasaun orsamentu ba konstrusaun barrajen iha territóriu laran atubele prezerva no sai hanesan armajenamentu ba udan been hodi bele garante fornesimentu bee ne’ebe sustentável ba komunidade inklui setór agrikultura.

Plataforma nasionál ne’e husu ba Ministériu Saúde, Agrikultura no Peska no Edukasaun atu aloka orsamentu ba bee no saneamentu purvolta 0.1% husi OJE ba kada instituisaun atu nune’e bele integra servisu sira hodi bele atinje meta PEDN.

Husu mós Parlamentu Nasionál hodi apoiu Governu hodi halo disksaun kle’an nune’e bele iha alokasaun Orsamentu natoon ba setór bee, saneamentu no ijiene. No mós husu prevene investimentu sira ne’ebé kontinua ho tipu deve osan iha ne’ebé sei afeta Estadu iha tusan ba futuru.

Iha proposta alokasaun OJE 2024 ne’ebé aloka ba setór bee no saneamentu kontinua la nato’on tanba purvolta 1.3% no kontinua laiha alokasaun orsamentu ba asuntu bee moos no saneamnentu inklui operasaun no manutensaun ba bee no saneamentu, so iha de’it mak orsamentu ba saláriu no vensimentu no mós sasán no servisu.

Iha PEDN Governu hakarak halo investimentu boot atu halo reabilitasaun no haluan sistema irigasaun inklui barrajen hodi nune’e bele hadi’ak armajenamentu bee, atu nune’e bele kapta udan been hodi fornese bee ba komunidade sira no mós ligasaun ho dezenvolvimentu setór agrikultuta, maibe iha proposta OGE 2024 laiha alokasaun orsamentu ruma ba asuntu refere.

Tuir rezultadu husi sensus 2022 uma kain ne’ebe asesu ba torneira publiku hamutuk 39.5%, Uma kain ne’ebe torneira instala iha uma laran 10.2% no uma kain ne’ebe kontinua utiliza ou asesu ba mota, bee matan, lagoa, kolam no irrigasaun hodi utiliza ba nesesidade loron-loron nian hamutuk 8.7% no koleta udan been 0.2%.

Iha sensus 2022 hatudu katak kuaze uma kain besik 70% mak asesu ona ba bee tantu torneira públiku, kanalizasaun bee ba uma, uma oin no bee posu. Sei hela uma kain balun mak sei depende ba udan been, sosa, kuru bee iha mota no lagoa no kuru iha bee matan direta.

Rezultadu deskobrementu husi Membru sira (HAK) periodu Marsu 2022- Jullu 2023 ba kondisaun asesu bee komunidade iha Munisipiu 6 (Baucau, Viqueque, Aileu, Ainaro, Dili no Ermera), ho Suku 56, aldeia 338, total populasaun 308,213 no mós total uma kain 66,363. “Klasifika uma kain ne’ebé asesu kanalizasaun total 46,210, uma kain ne’ebe asesu bee matan totál 9,849 no uma kain ne’ebé asesu bee posu totál 10,304”. Klasifika ba pursentu asesu kanalizasaun 69,63 %, asesu bee matan 14, 84 % no asesu bee posu 15, 53 %.

Dadus Husi GFFTL ne’ebé halo auditoria sosiál iha Munisipiu Baucau ba servisu públiku sira no fasilidade postu saúde liu husi Ministériu Saúde iha Timor-Leste rezultadu hatudu katak: BESI husi postu saúde 27 inklui hospital Referral 1 avalia katak: Asesu Bee Baziku 7 (25%), Limitasaun 15 (53,6%) no laiha fornesimentu 6 (21,40%). saneamentu baziku 2 (7,14%), limitasaun 23 (82,14%) no laiha servisu 3 (10,71%).

Jornalista: Jesuína Xavier

Editór        : Florencio Miranda Ximenes

iklan
iklan

Leave a Reply

iklan
error: Content is protected !!