VIQUEQUE, 12 dezembru 2023 (TATOLI)—Reprezentante sosiadade sivíl, Diretór Fundasaun K’nua Haberan Komunidade (KHK), Agusto Pinto, husu Governu no Parlamentu Nasionál (PN) atu tau prioridade ba setór tolu, iha debate proposta-lei Orsamentu Jerál Estadu (OJE) tinan 2024.
“Ohin hahú debate OJE 2024, ami sosiadade sivíl husu ba Parlamentu Nasionál atu tau prioridade ba setór edukasaun, saúde no agrikultura ne’ebé sai setór prinsipál hodi halo investimentu ba jerasaun sira,” Agusto Pinto, hateten ba Agência Tatoli, iha ninia knaar fatin, postu Viqueque Vila, tersa ne’e.
Nia konsidera, orsamentu Estadu hanesan investimentu ida hodi aselera dezenvolvimentu ba munisípiu hotu.
“Ita bele reforsa setór edukasaun hodi eleva estudante inklui profesór sira-nia kualidade hanorin ne’e importante tanba Timor-Leste nia rekursu umanu sei limtadu. Entaun presiza halo investimentu maka’as ba setór edukasaun, se lae ita maka nune’e de’it, labele kompete ho nasaun seluk, liu-liu ASEAN tanba ita atu sai membru, bainhira la preparadu difísil atu kompete ho nasaun seluk,” nia fó hanoin.
Notísia relevante : KHK no CRS apoia mákina prosesa mina-nuu ba grupu ualu iha Uma-Uain Leten Viqueque
Aleinde ne’e, nia nota katak durante ne’e ezekutivu sira seidauk tau importánsia ba setór agrikultura tanba hahú independénsia to’o agora, dezenvolvimentu agrikultura ladún la’o.
“Maski ita hatene katak ita-nia nasaun poténsia ba setór agrikultura, liu-liu iha munisípiu Viqueque, maibé Governu troka malu beibeik la tau prioridade ba setór agrikultura, ne’ebé la motiva agrikultór sira, nune’e ita kontinua depende ba importasaun, liu-liu foos,” nia akresenta.
Tanba ne’e, nia husu atu membru Parlamentu Nasionál sira labele aprova subsídiu ba sira-nia an, maibé tenke haree halo investimentu ba setór importante sira.
Aleinde ne’e, nia haree katak presiza mós tau prioridade ba dezenvolvimentu infraestura, liu-liu dalan sira-ne’ebé liga munisípiu, postu no suku sira iha área rurál sira ne’ebé seidauk hadi’a.
“Presiza aselera dezenvolvimentu hodi fasilita povu lori sira produtu lokál asesu ba merkadu,” nia hato’o.
Jornalista : Vitorino Lopes da Costa
Editora : Julia Chatarina
