DILI, 12 dezembru 2023 (TATOLI)—Rozenha Fátima de Oliveira Martins, substitui Deputadu hosi bankada Partidu Demokrátika (PD) iha Parlamentu Nasionál (PN), Antonio da Conceição “Kalohan” iha abertura ba debate proposta-lei Orsamentu Jerál Estadu (OJE) 2024 iha faze jeneralidade iha PN.
Ida-ne’e akontese tanba Xefe Bankada PD, Antonio da Conceição “Kalohan”, hetan nomeasaun hosi Prezidente Repúblika, José Ramos Horta, hodi asume pasta hanesan Embaixadór Extraordináriu no Plenipotensiáriu Repúblika Demokrática Timor-Leste ba Embaixadór Repúblika Indonézia, no iha tersa (12 dezembru 2023) hetan pose hosi Xefe Estadu.
“Asuntu karta aseitasaun subtituisaun temporária, relasiona asuntu iha leten, ha’u Rozenha Fatima de Oliveira Martins, iha kandidatura numeru-sia tuir lista Tribunál Rekursu leitura akordaun 0023/2023-TR. No, bazeia ba lei númeru 9/2017, 05 maiu, kona-ba eleisaun parlamentár kuarta-alterasaun ho lei numeru 6/2006, 28 dezembru, lei numeru-3 artigu-15, ha’u asentu atu subtitui Deputadu eleitu sesta-lejislatura, Antonio da Conceição,” Sekretária Meza PN, Virginia Ana Belo, lee sai karta aseitasaun subtituisaun iha sala plenária, tersa ne’e.
Hosi karta ne’e mós sita atu hetan autorizasaun husi Prezidente Parlamentu Nasionál, Maria Fernanda Lay. Nune’e prezidente Parlamentu Nasionál, Fernanda Lay, autoriza Deputada subtitui Rozenha Fatima de Oliveira Martins hodi hola fatin iha sala plenária.
Jornalista : Nelson de Sousa
Editór : Cancio Ximenes
