DILI, 12 dezembru 2023 (TATOLI)–Sekretaria Estadu Formasaun Profisionál no Empregu (SEFOPE) liuhosi Diresaun Nasionál Empregu no Exteriór (DNEE), iha kinta (14/12), sei anunsia tan rezultadu aplikante online ba vaga serbisu iha Austrália.
“Bainrua, ita sei fó sai tan rezultadu aplikante vaga online Austrália hosi aplikante 55.436, ne’ebé antes ne’e ita fó sai lubuk ida ona. Ida-ne’e ho objetivu atu hatan ba demanda sira ne’ebé empreza sira husu traballadór, tinan ne’e hamutuk 8.000,” Sekretáriu Estadu Formasaun Profisionál no Empregu, Rogério Araújo Mendonça, hateten, iha salaun Excelsior Resort, Praia dos Coceiros, tersa ne’e.
Notísia relevante : SEFOPE simu aplikante 55.436 hosi rezultadu rekrutamentu foun traballadór Austrália
Nia dehan, traballdor sira ne’ebé bainrua sei fó sai naran ne’e la signifika sira liu ona bá Austrália, maibé ida-ne’e foin liu dokumentu sira tanba hafoin ida-ne’e sei iha teste ba lian inglés mak foin determina sira liu ka lae.
“Ha’u mós hakarak husu ba públiku ne’ebé sempre kestiona rejistu ona iha tinan 2017, 2019 maibé naran laiha, ha’u orienta ona Diretór Nasionál Empregu no Exteriór ho ekipa téknika ne’ebé mak iha Diresaun hodi foti hotu sira-nia naran ne’ebé rejistu hotu ona hodi taka ba munisípiu sira, maibé sei haree ida-ne’ebé mak iha kapasidade mak nia sei liu, tanba sei liuhosi teste,” nia tenik.
Jornalista : Arminda Fonseca
Editora : Julia Chatarina
