iklan

NASIONÁL, DILI, HEADLINE, SOSIEDADE SIVĺL

Semana ne’e, ALMAMOR realiza kongresu hodi hili estrutura foun  

Semana ne’e, ALMAMOR realiza kongresu hodi hili estrutura foun  

Grupo ALMAMOR. Foto Jose de Sa

DILI, 12 dezembru 2023 (TATOLI)– Associação Nacional de Música de Timor (ALMAMOR), hahú iha loron 15 to’o 16 dezembru, realiza kongresu ba dahaat hodi sensibiliza ba artista timoroan hotu kona-ba lei kódigu direitu autór.

“Ita nia kongresu ne’e asesór jurídiku husi Sekretáriu Estadu Arte no Kultura sei mai aprezenta iha loron dahuluk kódigu direitu autór no direitu konexu ba ema hotu hodi bele hatene”,hatete Prezidente Komisaun Organizadora ba eventu, Leopoldo Moniz dos Santos Maia, liu husi konferénsia imprensa iha Bemori-Dili.

Kogresu ne’e, nia dehan importante tanba husu ba artista sura bele mai partisipa hodi bele entende didi’ak direitu autór.

Ba loron daruak ba kongresu ne’e sei debate estatutu ALMAMOR hodi hili fali estrutura foun ba manadatu tinan lima husi 2023 to’o 2028.

Tanba ne’e, nia agradese ba apoiu finanseiru husi Governu no setór privadu hamutuk rihun $30 ba atividade kongresu ne’e.

Iha biban hanesan, Sekretáriu Komisaun Organizadora, Jovi Batista, hateten kongresu ne’e sei envolve artista hotu ne’ebé iha obra artístika iha Timor-Leste.

“Artista sira iha área pintura, kantór, dansa, kultura, fotográfia no eskritór bele hola parte no partisipa iha kongresu”, nia afirma.

Respeita direitu autór

ALMAMOR husu ba ema hotu liuliu joven sira atu respeita direitu autór no direitu konexu iha Timor-Leste.

“Ema hahú hatene ona oinsa atu hala’o nia kreatividade rasik, maibe buat balun ne’ebé ami observa hela mak artista balun hananu ema seluk nia múzika hodi buka lukru la fó koñesimentu ba múzika nia na’in, ida ne’e mak presiza hadi’a”, Leopoldo Moniz dos Santos Maia hatete.

Nia hateten valoriza no respeita ema seluk nia direitu ne’e la presiza halo diskusaun, mas atu fó koñesimentu ba autór múzika.

“La susar ida atu husu autorizasaun, halo karta eskrita husu autorizasaun. Se laiha karta, entaun tenki bele buka halo kontaktu direita ba autor , husu autorizasaun ba múzika ne’e na’in”, nia husu.

Tanba ne’e, nia husu artista no autór múzika sira hotu atu rejista sira nia múzika iha ALMAMOR atu bele fó protesaun no advokasia  ba autór múzika no artista hotu-hotu iha Timor-Leste.

Jornalista: Jesuína Xavier

Editór        : Florencio Miranda Ximenes

iklan
iklan

Leave a Reply

iklan
error: Content is protected !!