COVALIMA, 13 dezembru 2023 (TATOLI) – Edukasaun Covalima simu ona sirkulár husi Ministériu Edukasaun (ME) ne’ebé bandu eskola públika sira atu halo kobransa osan hodi suku uniforme ba estudante sira.
“Sirkulár ne’ebé fó sai katak eskola sira labele halo kobransa osan atu suku uniforme ba estudante husi nivel ensinu pré-eskolár, ensinu báziku no sekundáriu, tanba Ministériu Edukasaun maka sei deside kór uniforme ba estudante iha eskola públika sira”, Diretór Edukasaun Covalima, Francelino Freitas Carvalho, informa ohin.
Bazeia ba sirkulár refere nia husu ba diretór eskola sira atu kumpre desizaun husi Edukasaun, tanba ME esforsu hodi aprova regulamentu hodi kria uniforme ba eskola sira ho baze ba artigu 14 husi Dekretu-lei númeru 32/2023, dekretu lei númeru 33/2023 no 34/2023, 31 maiu, ne’ebé aprova rejime jurídiku husi ensinu báziku, ensinu sekundáriu no pré-eskolár.
Ministériu Edukasaun besik konklui ona regulamentu kona-ba uniforma eskolár ne’ebé sei implementa ba eskola iha territóriu, uniforme eskolár ho modelu úniku, kompleta ho atributu relevante no sei sosa rasik husi inan-aman.
“Eskola prepara ona farda iha tinan 2023 no rekolla osan husi inan no aman ne’ebé sei hetan instrusaun espesífika iha regulamentu uniforme eskolár hodi garante identidade eskola nian”, dehan.
Tuir dadus, eziste iha munisípiu Covalima eskola hamutuk 135. Husi númeru ne’e eskola bázika sentrál iha 94 ne’ebé fahe ba eskola públika 83, eskola privada 11. Pré-eskolár 41 ne’ebé fahe ba pré-eskolár públiku 33 no privada ualu.
Notísia relevante: MEJD presiza define uniformizasaun farda eskola iha territóriu nasionál
Jornalista: Celestina Teles
Editora: Maria Auxiliadora
