DILI, 13 dezembru 2023 (TATOLI) – Diresaun Nasionál Ensinu Rekorrente husi Ministériu Edukasaun (ME) kontinua reforsa programa Alfanamor no Ekivalénsia hodi orsamenta ona ba iha tinan oin ho montante rihun $409-resin atubele lori ema hotu hetan edukasaun hanesan iha país ne’e.
Diretór Nasionál Ensinu Rekorrente, Alfredo de Araújo, dehan katak programa rua ne’e konsidera importante tanba fó oportunidade ba timoroan hotu ne’ebé lakon sira-nian direitu iha edukasaun atubele aprende filafali.
“Tanba ne’e, ita reforsa programa Alfanamor no Ekivalénsia ne’e atu responde ba situasaun ne’ebé maka akontese ohin loron”, dehan Alfredo de Araújo, iha Vila Verde, ohin.
Programa prioridade rua ne’e nia área kobertura ba to’o iha postu administrativu 65 no munisípiu 12 inklui Rejiaun Administrativa Espesiál Oé-Cusse Ambeno, nune’e bele loke oportunidade ba maluk sira inklui inan no aman sira ne’ebé maka la koñese letra no númeru atubele aprende hodi redús númeru analfabetu iha nasaun.
Programa Alfanamor nia implementasaun iha faze rua mak hanesan Hakat bá oin no Iha dalan. Husi programa Hakat bá oin ne’e konsidera baziku tebes tanba sei tulun maluk sira atu aprende hakerek naran, aprende halo konta inklui lee ho fraze ki’ik, nune’e bele abitua sira atu aprende kada loron to’o fulan neen hafoin kontinua ba faze Iha dalan. Bainhira remata faze sira ne’e bele hetan avaliasaun hodi hatene progresu saida maka ema sira ne’e aproveita iha programa Alfanamor ne’e rasik.
Program ne’e rasik la limite idade, tantu ferik komu katuas sei iha nafatin oportunidade atubele aproveita naran katak iha vontade hakarak aprende. Nune’e mós ba estudante ho idade produtiva ne’ebé maka lahatene hakerek no lee, sira bele aproveita iha programa ida ne’e no bainhira hetan ona avaliasaun maka pasa husi faze ida ne’e, nia bele tama kedan ba programa Ekivalénsia depende ba tempu ne’ebé nia drop out.
“Karik ita-nian estudante ne’e maka droup out iha eskola bazika terseiru siklu nia bele kontinua eskola no iha oportunidade hakat kedan ba faze IV ka faze V, nune’e nia eskola tinan ida de’it bele tuir ona ezame nasionál”, esplika.
Programa Ekivalénsia ne’e atu fó asisténsia ba labarik sira ne’ebé iha posibilidade hakarak kontinua sira-nian ekivalénsia iha ensinu baziku. To’o agora seidauk iha ekivalénsia nivel sekundáriu tanba sei iha hela planu atu reforsa iha tinan oin, maibé ba tinan ida ne’e, Diresaun Ensinu Rekorrente rejista iha estudante hamutuk 337 maka finaliza ona sira-nian estudu iha ensinu baziku. Antes ne’e mós iha totál estudante hamutuk 401 maka halo inskrisaun, maibe 344 maka partisipa iha ezame nasional, 57 mak la tuir, hitu reprovadu.
Ba tinan oin, diresaun hakarak dezenvolve liután programa rua ne’e bazeia ba kompeténsia no kapasidade finanseira ne’ebé iha mak prevee ona rihun $409-resin ba tinan tomak hodi nune’e bele reforsa liután nesesidade sira ne’ebé maka hatuur ona iha planu.
Jornalista: Tomé Amado
Editora: Maria Auxiliadora
