DILI, 13 dezembru 2023 (TATOLI) – Sekertáriu Estadu Protesaun Sivil (SEPS, sigla portugés) Domingos Mariano Reis hamutuk ho ekipa autoridade Protesaun Sivil Nasionál entrega karreta autoklizmu ida ba bombeiru Munisípiu Liquiça hodi reforsa liután servisu. Apoiu ne’e hanesan dalan di’ak atu kombate urjente ba inséndiu ne’ebé karik akontese iha Munisípiu Liquiça.
Sekretariu Estadu hateten, Orsamentu Jeral Esatdu (OJE) 2023 nian, Protesaun Sivil aloka orsamentu besik millaun $3 hodi sosa karreta autoklizmu no autoeskada hamutuk unidade 17 hodi nune’e bele koloka balun ba munisípiu ida-idak atu bele kombate inséndiu ne’ebé mak akontese.
“Ita hotu hatene katak orsamentu jerál 2023, Protesaun Sivil aloka ona, millaun $3 hodi bele sosa kareta autoklizmu ho autoeskada ba Protesaun Sivil nian iha Nasionál ho totál 17 no husi ne’e koloka ba munispiu sira ne’ebé konsidera númeru inséndiu aas”, hatete Sekretáriu Estadu ne’e liuhosi komunikadu ne’ebé Agência TATOLI asesu, ohin.
Nia dehan, apoiu kareta bombeirus ida ba Munisípiu Liquisça ne’e tamba haree liu ba númeru inséndiu ne’ebé akontese ho pursentu né’ebé mak boot.
OJE tinan 2024 nian, Governu liuhosi SEPS sei sosa tan, karreta autoklizmu bombeiru nian hamutuk hitu ba Postu hanesan, Ramelau Natarbora, Uatúlari Lospalos Atsabe no Pasabe.
Jornalista: Hortencio Sanchez
Editór : Zezito Silva
