COVALIMA, HEADLINE

ADTL kontinua promove no proteje direitu ema ho defisiénsia sira

ADTL kontinua promove no proteje direitu ema ho defisiénsia sira

Ema ho difisiénsia iha Covalima partisipa semináriu. Imajen Tatoli/Celestina Teles.

COVALIMA, 14 dezembru 2023 (TATOLI) –  Asosiasaun Difisiénsia Timor-Leste (ADTL) no Klibur Dezenvolvimentu Sustentavél Timor-oan (KDESTO) organiza semináriu hodi partilla informasaun kona-ba promosaun no protesaun direitu ba ema ho defisiénsia sira.

Reprezentante ADTL, Luciano Dias Cabral, informa katak atividade ida ne’e hodi komemora Loron Internasionál Ema ho Defisiénsia (EhD) ne’ebé monu iha 03 dezembru no Loron Internasionál Direitu Umanu iha 10 dezembru.

Nia dehan Timor-Leste ratifika ona konvensaun internasionál direitu ba ema ho defisiénsia, nune’e Governu iha papél no devér atu implementa konvensaun refere hodi hakonu direitu ba EhD.

“Bazeia ba observasaun husi ADTL hamutuk ho nia membru sira, ema ho defisiénsia seidauk hetan direitu kompletu, maibé iha buat balun Governu komesa inklui ona iha programa sira”, realsa.

Tanba ne’e, ADTL husu ba Governu sentrál no lokál atu fó prioridade ba asuntu defisiénsia hodi inklui iha planu programa no orsamentu.

Iha sorin seluk, reprezentante administradór Covalima, Miguel Armada Cardoso, salienta autoridade lahalo diskriminasaun, tanba ne’e pesoál defisiénsia na’in-ida serbisu iha gabinete administradór.

“Dala barak ita haluha malu tanba kestaun serbisu, maibé ita nunka halo diskriminasaun. Ttuir lei ita hotu iha direitu ne’ebé hanesan”, dehan.

Iha Konstituisaun Repúblika Demokrátika Timor-Leste (RDTL) deskreve katak Sidadaun defisiente sira iha direitu ne’ebé hanesan no sai sujeitu ba kna’ar husi sidadaun sira seluk nian no laiha sidadaun ida mak bele hetan diskriminasaun kontra ho razaun kondisaun fízika ka mental tuir alínea 1 husi artigu 21, no alínea 2 husi artigu 16 nian.

Tuir relatóriu Planu Asaun Nasionál ba Ema ho Defisiénsia (PANED) 2014-2018, dadus publikadu husi Diretoria Nasionál Estatístika Ministériu Finansa nian hatudu katak ema 48.243 ne’ebé hela iha Timór ho tipu defisiênsia nian balun. Ida ne’e husi totál ida husi ema 1.066.409 eh besik 4,6% husi populasaun.

Katak, ema ho defisiénsia fízika hamutuk 20.593, ema ho defisiénsia matan 29/488, defisiénsia tilun 17.692, defisiénsia intelektuál no saúde mentál 13.308.  Husi totál ne’e, 53% mane no 47% feto. Depois, 10,5 % iha otas entre tinan 0 no 19 no defisiénsia sai hetok komún iha área rurál sira.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!