DILI, 14 dezembru 2023 (TATOLI) – Ministra Saúde, Elia dos Reis Amaral, informa Empreza Sali-Magu Unipesoal Lda hatama ona ai-moruk mai Institutu Nasionál Farmasia Produtu Medikamentu (UNFPM) ho kamioneta haat. Ai-moruk hirak ne’e sei distribui ba fasilidade saúde sira iha territóriu nasionál.
“Ita hotu hatene katak ita propoin orsamentu retifikativu ho montante millaun $6 ne’ebé mak ita hotu akompaña daudaun ho ida-ne’e mak kompaña kompra ona ohin ai-moruk tama ona iha INFPM ho kamioneta haat, ai-moruk hirak ne’e atu ita bele distribui ba fasilidade saúde sira”, Elia dos Reis Amaral hateten ba jornalista sira iha INFPM Kampu Alor, ohin.
Ministra Saúde agradese ba Empreza Sali-Magu tanba kumpre ona dever hodi kompra ai-moruk ida-ne’e ohin loron tama ona iha INFPM.
“Ha’u agradese ba kompaña ne’ebé mak kumpre ona sira-nia obrigasaun ba kontratu ne’e rasik ho ida-ne’e mak ohin ai-moruk karreta kaminota haat lori ona mai, ita bele haree no verifika nune’e bele halo distribuisaun ba fasilidade saúde iha territóriu nasionál”, nia informa.
Nia dehan, ekipamentu médiku ne’ebé mak Empreza Sali-Magu hatama ne’e mak hanesan ai-moruk, reajente no konsumavél sira.
“Kona-ba item hira ita seidauk hatene tanba INFPM identifika mak ami foin informa ba ita boot sira, tanba ekipamentu médiku ne’e sosa iha nasaun oioin hanesan Indonézia, India, Sirlanka, Malázia no Austrália”, nia afirma.
Iha fatin hanesan, Diretór Institutu Nasionál Farmasia Produtu Medikamentu (INFPM), Brigido Dias dehan INFPM deskarega hela ekipamentu médiku sira ne’ebé mak sosa ho situasaun emerjénsia nian husi Empreza Sali-Magu.
“Ai-moruk sira ne’e balun hodikalan tama no ohin tama tan, entaun nia prosesu ne’e ita simu iha ne’e depois entrega ba ekipa sira haree oinsá ita bele distribui ba fasilidade saúde iha Timor-Leste”, Brigido Dias informa.
Nia haktuir, kareta kaminota haat mak tula mai depois INFPM verifika depois informa ba ita boot sira kona-ba kada item sira.
“Sasan sira ne’e ha’u seidauk haree loloos tanba lista foin tama aprovizionamentu, horsida ami bele haree tanba ai-moruk sira ne’e hola iha Indonézia no fatin seluk tan”, nia konklui.
Notísia relevante : SAMES prevee orsamentu millaun $6 kompra ai-moruk
http://HNGV hola ai-moruk rasik tanba menus hosi INFPM
Jornalista : Felicidade Ximenes
Editór : Zezito Silva
