OJE 2024 ba MKAE, SEFOPE, SECoop aprovadu iha espesialidade
DILI, 14 dezembru 2023 (TATOLI)—Parlamentu Nasionál (PN), kinta ne’e, liuhosi debate espesialidade aprova proposta Orsamentu Jerál Estadu (OJE) 2024 ba Ministériu Koordenadór Asuntu Ekonómiku (MKAE) $4.153.490 ho votu a-favór 45, kontra 15 no abstensaun haat (4).
“Ne’ebé, orsamentu MKAE pasa,” Prezidente Parlamentu Nasionál, Maria Fernanda Lay, hateten liuhosi diskusaun no votasaun ba proposta OJE 2024 faze espesialidade ba loron dahuluk iha sala plenária PN.
Ministériu Koordenadór asuntu Ekonómiku (MKAE) iha proposta OJE 2024 prevee $4.153.490 hodi aloka ba saláriu vensimentu $2.091.210, bens no serbisu $1.816.780, transferénsia públika $150.000, kapitál menór $95.500 no kapitál dezenvolvimentu laiha.
Tuir livru proposta-lei OJE 2024 planu asaun anuál hosi MKAE prioriza programa funsionamentu no dezenvolvimentu instituisionál ho sub-programa ida no atividade haat, no programa investimentu no diversifikasaun ekonómiku ho sub-programa rua no atividade haat.
Nune’e mós, PN aprova mós proposta OJE 2024 ba Sekretária Estadu Formasaun Profisionál no Empregu (SEFOPE) hamutuk $7.640.597 ho votu a-favór 44, kontra hitu (7) no abstensaun 13.
Hosi montante $7.640.597 ne’e hodi aloka ba sálariu vensimentu $3.638.690, bens no serbisu $1.753.453, transferénsia públika $1.553.454, kapitál menór $500.000 no kapitál dezenvolvimentu $195.000.
Tuir livru proposta-lei OJE 2024 planu asaun anuál hosi SEFOPE prioriza programa dezenvolvimentu rurál no urbanu ho nia sub-programa reforsa serbisu SEFOPE iha munisípiu no exteriór ho atividade ida.
Programa funsionamentu no dezenvolvimentu instituisionál ho sub-programa tolu no atividade 10.
Programa inkluzaun sosiál ho sub-programa ida no atividade rua.
Programa investimentu no diversifikasaun ekonómika ho ninia sub-programa lima no atividade 17.
PN aprova mós proposta-lei OJE 2024 ba Sekretária Estadu Kooperativa (SECoop, sigla portugés) $5.162.599 ho votu a-favór 43, kontra sia (9) no abstensaun 12.
Hosi montante $5.162.599 hodi aloka ba saláriu vensimentu $1.883.897, bens no serbisu $1.894.937, transferénsia públika $1.109.065, kapitál menór $274.700 no kapitál dezenvolvimentu laiha.
Tuir livru proposta-lei OJE 2024 planu asaun anuál hosi SEKOOP fó prioridade ba Programa dezenvolvimentu rurál no urbanu ho nia sub-programa promove no estabelese kooperativa ho nia atividade neen, sub-programa promove no dezenvolvimentu produtu kooperativa ho atividade rua, no programa funsionamentu no dezenvolvimentu instituisionál ho sub-programa rua no atividade hitu.
Jornalista : Nelson de Sousa
Editór : Cancio Ximens
