DILI, 14 dezembru 2023 (TATOLI)–Sekretaria Estadu Formasaun Profisionál no Empregu (SEFOPE) liuhosi Diresaun Nasionál Empregu no Estranjeiru (DNEE), kinta ne’e, fó sai rezultadu ikus hosi aplikasaun vaga serbisu bá Austrália via online.
“Ohin ita fó sai rezultadu ikus ba aplikante vaga online hamutuk 50.578, hosi aplikante 55.436 ne’ebé SEFOPE loke iha tinan 2022 hodi akumula vaga hosi tinan 2016 to’o 2021. Ohin ita hamutuk ona sistema,” Sekretáriu Estadu Formasaun Profisionál no Empregu, Rogério Araújo Mendonça, hateten liuhosi konferénsia imprensa ne’ebé hala’o iha salaun SEFOPE, Caicoli.
Nia informa, ba aplikante sira ne’ebé naran rejistu ona iha sistema online, ida-idak bele bá haree naran iha SEFOPE munisipál tanba sei taka sai hotu iha munisípiu hotu inklui Rejiaun Administrativa Espesiál Oé-cusse Ambeno (RAEOA) tanba teste eskrita no entrevista sei halo iha kada munisípiu.
“Aplikante sira ne’ebé naran iha ona sistema online la signifika pasa hotu maibé sei tuir tan teste eskrita no entrevista, da-ne’ebé mak liu naran sei hatama hotu iha sistema ida naran Work Ready Pool hodi hein empregadór sira husu bazeia ba kritéria ne’ebé fó mai,” nia akresenta.
Notísia relevante : SEFOPE despede traballadór 52 bá serbisu iha Austrália
Ba kandidatu traballadór sira ne’ebé naran iha ona sistema online atu tuir prosesu teste eskrita no entrevista tuir mai, sedu liu sei realiza iha fevereiru lae marsu 2024.
“Ha’u husu ba aplikante sira, ba hirak ne’ebé la pasa iha teste eskrita no entrevista, SEFOPE nafatin fó oportunidade atu tuir formasaun lian inglés iha kada munisípiu no sentru formasaun sira ne’ebé estabelese hosi SEFOPE no hetan apoiu hosi SEFOPE hodi nune’e bele tuir filafali teste eskrita no entrevista faze tuir mai.
Iha fatin hanesan, Diretór Jerál Formasaun Profisionál no Empregu, Carlito Cabral Rosário hateten, aplikante 50.578, kompostu hosi feto 19.314 no mane 31.274, ne’ebé konsege rejistu iha sistema online, hosi Aileu 3.395, Ainaro 2.967, Ataúro 262, Baucau 7.044, Bobonaro 4.675, Covalima 3.181, Dili 8.281, Ermera 5.522, Lautém 3.353, Liquiçá 2.567, Manatuto 2.096, Manufahi 2.471, RAEOA 990, Viqueque 3.774.
Jornalista : Arminda Fonseca
Editora : Julia Chatarina
