COVALIMA, 15 dezembru 2023 (TATOLI) – Udan-boot ne’ebé akontese iha loron 14 halo uma ida iha aldeia Lakonak, suku Debos, munisípiu Covalima, monu tun tanba volume bee mota boot no tama uma laran.
Vítima Filomena das Dores konta katak udan ne’ebé tau kuaze oras rua ne’e hakonu mota tanba kapasidade valeta ne’ebé ki’ik nune’e bee tama no danifika uma.
“Dezastre ne’ebé akontese halo ha’u la konsege salva sasán uma-laran hanesan roupa, ha’u-nian oan nia dokumentu sira hanesan sertidaun RDTL, sertidaun kazamentu no batizmu, kaderneta no diploma. Ha’u ho katuas oan no hau-nian oan sira maka halai sai hodi salva de’it ami-nian vida”, Filomena dehan ba Tatoli iha Lakonak, ohin.
Vítima ne’e relata katak akontesimentu ne’e mosu bainhira sira toba dukur no bee tama halo sira-nian ain bokon, nune’e sira hakfodak no hadeer. “Ami ta’uk, ami na’in-neen halai sai husi uma-laran, la kle’ur uma monu tun”, realsa.
Daudaun, vítima sira hela provizoriamente ho família hodi hein apoia emerjénsia husi Autoridade Protesaun Sivíl (APC, sigla portugés).
Iha sorin seluk, Komandante Autoridade Protesaun Sivíl, Inspetór xefe Flávio Mendes dos Santos, ho nia ekipa tun direta hodi observa fatin refere. Iha terrenu haree katak vítima sira presiza hetan apoia emerjénsia no apoia materiál rekuperasaun hodi rekonstrui uma.
“Agora seidauk bele fó apoia emerjénsia, maibé nia promete iha segunda, loron 18, sei fó apoiu ai-han no la’ós ai-han, nune’e vítima bele atende ba nesesidade uma-laran, foos, mina, supermie no sasán dapur hanesan sanan, tasu, bikan, kanuru, biti, balde no seluk tan” dehan.
Aleinde uma ida ne’ebé monu, APC mós rejista uma-kain 22 iha iha suku Beco, postu administrativu Suai maka sai vítima ba inundasaun no sei fó apoia emerjénsia iha semana oin.
Jornalista: Celestina Teles
Editora: Maria Auxiliadora
