VIQUEQUE, 15 dezembru 2023 (TATOLI)—Diretór Servisu Saúde munisípiu Viqueque, Pedro da Silva Fereira, hateten, desizaun Governu liuhosi Ministériu Saúde la extende kontratu pesoál saúde ne’ebé termina iha loron 31 dezembru 2023 sei difikulta atendimentu abitante iha munisípiu Viqueque.
“Ami durante ne’e preokupa ba XI Governu ne’ebé atu hapara kontratu pesoál saúde no daudaun ne’e kontratadu sira serbisu iha postu saúde 43 no sentru saúde lima. Karik desizaunn ida-ne’e maka akontese, ami sente sei difikulta atendimentu ba abitante sira ne’ebé hela suku tolu,” Diretór dehan ba Agência Tatoli, iha ninia knaar fatin, postu Viqueque Vila, sesta ne’e.
Durante ne’e profisionál saúde ne’ebé serbisu iha Viqueque hamutuk 100, ne’ebé durante ne’e kontratadu mak reforsa serbisu atendimentu iha baze.
“Desizaun hapara kontratu sei fó impaktu maka’as. Karik bele ne’e kontrata aumenta de’it pesoál saúde hodi ita destaka ba postu saúde sira,” nia fó hanoin.
Notísia relevante : Postu saúde Uaimori rejista moras ISPA 800 durante fulan-sia
Fasilidade saúde iha munisípiu Viqueque kompostu hosi sentru saúde lima, postu saúde 43 no Ospitál Internamentu ida ne’ebé lokaliza iha postu Viqueque Vila.
“Kada postu saúde ami destaka kontratadu na’in-rua, médiku limitadu liu na’in-39 ne’ebé la kobre hotu postu saúde. Mapamentu ne’ebé ami halo tuir polítika Ministériu Saúde katak kada postu saúde tenke prienxe ema na’in-hitu, ne’ebé ami presiza tan profeisionál na’in-46 hafoin kompleta ba postu saúde sira iha Viqueque,” Diretór relata.
Tuir dadus, Servisu Saúde Viqueque kompostu hosi rejime jerál hamutuk na’in-89 no rejime espesiál aliadu na’in-88, asistente enfermeiru/a na’in-19, enefermeira na’in-126, médiku na’in-39 no parteira na’in-26 ho totál hamutuk na’in-423, ne’ebé hosi númeru ne’e pesoál saúde hamutuk na’in-93 kontraradu, ne’ebé destaka ba postu saúde 43 no sentru saúde lima.
Jornalista : Vitorino Lopes da Costa
Editora : Julia Chatarina
